նախընտրելի դարձնելՀայաստանի տարածքային կառավարման նախարարին կից կոլեգիայի այսօրվա նիստում ներկայացվել է Գյուղական համայնքների սոցիալ-տնտեսական զարգացման մակարդակների ամփոփ գնահատման մեթոդաբանությունը:
ՏԿՆ մամուլի ծառայությունից հայտնում են, որ փաստաթղթի մշակումը բխում է ՀՀ տարածքային զարգացման հայեցակարգի միջոցառումների ծրագրից: Ըստ ՏԿՆ տարածքային կառավարման եւ զարգացման վարչության պետ Հ. Գալստյանի`այս մեթոդաբանությունը, մշակված բանաձեւերի հիման վրա, թույլ է տալիս ըստ համայնքների գնահատել դրանց խոցելիության մակարդակը:
Նիստը վարող փոխվարչապետի, տարածքային կառավարման նախարարի պաշտոնակատար Արմեն Գեւորգյանը նշել է, որ համայնքներում տարբեր ծրագրերի իրականացումը, պետական աջակցության քաղաքականությունը հիմնվելու է այս մեթոդաբանության վրա, եւ այն պետք է լինի առավելագույն օբյեկտիվ: Նա առաջարկեց փաստաթղթի նախագիծը մեկ անգամ եւս ուղարկել շահագրգիռ կազմակերպություններին, ինչպես նաեւ հաջորդ ամիս տեղական եւ միջազգային համապատասխան կառույցների մասնակցությամբ կազմակերպել քննարկում եւ ամփոփել առաջարկությունները:
Փաստաթուղթը ՀՀ կառավարության քննարկմանը կներկայացվի հունիսին:
Տեղական ինքնակառավարման վարչության պետ Ա. Գիլոյանը տեղեկություններ ներկայացրեց համայնքների բյուջեների ընթացիկ տարվա առաջին եռամսյակի կատարողականի եւ աշխատավարձի գծով պարտքերի մարման գործընթացի վերաբերյալ: Ընդամենը եկամուտներն առաջին եռամսյակում կազմել են 20 մլրդ 590 մլն 448 հազար դրամ (Երեւանը ներառյալ)` 92,6 % կատարողական: Նախորդ տարվա նույն ժամանակահատվածի համեմատ փաստացի մուտքերն աճել են 9 %-ով կամ 1 մլրդ 696 մլն 372 հազար դրամով:Սեփական եկամուտները կազմել են 5 մլրդ 383 մլն 354 հազար դրամ (կատարողականը` 98,9% ): 2012թ-ի նույն ժամանակահատվածի համեմատ սեփական եկամուտների հավաքագրման ցուցանիշն աճել է 13.3 %-ով կամ 630 մլն 431 հազար դրամով: Նախորդ տարիների աշխատավարձի պարտքը 01.01.2013 թ-ի դրությամբ կազմել էր 104 մլն 731 հազար դրամ, որից 15.04.2013 թ-ի դրությամբ մարվել է 40 մլն 872 հազար դրամի չափով:
Ա. Գեւորգյանն ընդհանուր առմամբ դրական համարեց սեփական եկամուտների հավաքագրման միտումները եւ հույս հայտնեց, որ դրանք կպահպանվեն նաեւ տարվա կտրվածքով: Միեւնույն ժամանակ հանձնարարեց ինչպես եկամուտների հավաքագրման, այնպես էլ աշխատավարձերի պարտքի մարման մասով թերացումներ արձանագրած մարզերում ուսումնասիրել պատճառները:
Կոլեգիայի նիստում տեղեկություններ ներկայացվեց դեռեւս 2009թ-ին ԱԺ-ում առաջին ընթերցմամբ ընդունված <<Ֆինանսական համահարթեցման մասին>> ՀՀ օրինագծի հնարավոր կիրարկման, դրա ազդեցության լրացուցիչ ուսումնասիրության մասին կատարված աշխատանքների վերաբերյալ:
Առաջարկվեց կոլեգիայի նիստում հնչեցված դիտարկումները քննարկման առարկա դարձնել նաեւ օրինագծի վերաբերյալ առաջիկայում նախատեսվող խորհրդարանական լսումների ժամանակ:
Նիստում քննարկվեցին նաեւ հանրապետության քաղաքային եւ գյուղական համայնքների աշխատակազմերի եւ դրանց միասնականացման անհրաժեշտության, վարչական աշխատանքների արդյունավետ կազմակերպման հարցերը: Համայնքային ծառայության հարցերի վարչության պետ Ա. Սողոմոնյանը ներկայացրեց <<Քաղաքապետարանների (գյուղապետարանների) աշխատակազմերի աշխատակիցների թվաքանակի որոշման օպտիմալ մոդելը>>, որտեղ նաեւ առաջարկություններ կան բնակչության նույն թվաքանակ ունեցող համայնքների աշխատակազմերի աշխատակիցների օպտիմալ թվի վերաբերյալ:
Ա. Գեւորգյանը նշեց, որ այս խնդիրը պետք է քննարկել եւ գտնել լուծման օպտիմալ տարբերակներ` հարցի լուծումը կարեւորելով նաեւ համայնքների վարչական ծախսերի արդյունավետ տնօրինման տեսանկյունից:
Կոլեգիան ի գիտություն ընդունեց ուսումնասիրության արդյունքները, որոշվեց այն քննարկել նաեւ մարզպետարանների համապատասխան ստորաբաժանումների պատասխանատուների հետ:
