Վերջերս Ռուսաստանի քաղաքացի Ժերար Դեպարդիեն Սարանսկում ստացել է անհատ ձեռներեցի  վկայական: Այդ մասին հայտնել է դերասանի ընկերը` Գոսֆիլմոֆոնդի ղեկավար Նիկոլայ Բորոդաչյովը:

Ըստ Բորոդաչյովի` դերասանը կզբաղվի բեմական, կինեմատոգրաֆիական գործունեությամբ, հնարավոր է՝ սեփական սրճարան բացի, հաղորդում է gazeta.ru-ն: Սարանսկում Դեպարդիեն իրավաբանական անձ է գրանցել` Ռուսաստանի տարածքում գործունեության եկամուտներից հարկերի վճարման համար: 

Սարանսկ ժամանելուց առաջ Դեպարդիեն բաց հարցազրույց էր տվել, որում պատմել էր, որ ռուսական քաղաքացիությունը հենց այնպես չի ստացել.  նա պատրաստվում է վճարել հարկերը եւ օգտվել առողջապահությունից, նաեւ նշել էր, որ մնում է միայն լեզուն յուրացնել, հաղորդում է dni.ru-ն:

Հիշեցնենք, որ ֆրանսիացի հայտնի դերասան Ժերար Դեպարդիեն  Ֆրանսիայի նախագահ Ֆրանսուա Օլանդի հարկային բարեփոխումներից հետո վճռել էր փոխել բնակության վայրը: 2013թ. հունվարի սկզբին դերասանը ռուսական քաղաքացիություն էր ստացել, որից հետո գրանցվել էր Մորդովիայում` Սարանսկում: Դերասանը նաեւ հինգսենյականոց բնակարան ունի Գրոզնիում, որի փաստաթղթերը նրան էր հանձնել հանրապետության նախագահ Ռամզան Քադիրովը: