նախընտրելի դարձնել
Մոլդովայի հայ համայնքի ներկայացուցիչները հայտնել են դիվանագիտական սկանդալ հրահրած խորհրդարանական, փաստաբան Աուրելիա Գրիգորիուին աշխատանքից հեռացնելու պահանջ ներկայացնելու մտադրության մասին, որը նախորդ շաբաթ Երեւանի կոնֆերանսում հայտարարել էր, թե «Հայաստանը գրավել է Ադրբեջանի տարածքի 20%-ը` ադրբեջանցիների նկատմամբ իրականացնելով ցեղասպանություն»:
«Մոլդովայի Հանրապետության հայ համայնքը հանդես է եկել հայտարարությամբ: Սկզբում մենք տվյալ հայտարարությունը հրապարակել ենք էլեկտրոնային լրատվամիջոցներում, իսկ այս շաբաթ Աուրելիա Գրիգորիուին աշխատանքից հեռացնելու պահանջով համապատասխան փաստաթուղթը համայնքի նախագահի ստորագրությամբ եւ կնիքով կուղարկվի խորհրդարան», - հուլիսի 8-ին OMEGA գործակալությանը հայտնել է Մոլդովայի հայ համայնքի ներկայացուցիչ, քաղաքագետ Էռնեստ Վարդանյանը:
Ըստ նրա` Երեւանում եվրոպական կոնֆերանսին Գրիգորիուի պահվածքը սկանդալային էր եւ անթույլատրելի, ինչը մեծ վնաս է հասցնում Մոլդովայի եւ Հայաստանի փոխհարաբերություններին: «Գրիգորիուն չի նկատվել մարդու իրավունքների անմիջական պաշտպանության գործընթացում, այսինքն այն, ինչը նրա ուղղակի պարտականությունն էր: Բոլորը խոսում են, որ նրա այդ ելույթը կարող է վնաս հասցնել հայ-մոլդովական հարաբերություններին: Եւ ավելին, չմոռանանք, որ հուլիսի 11-ին Քիշինեւ է ժամանում Հայաստանի նախագահ Սերժ Սարգսյանը: Ես չեմ կասկածում, որ դա հատուկ է կազմակերպված եղել այս այցի նախօրեին, հատուկ, որպեսզի այցի վրա որեւէ կերպ ստվեր նետվի», - ընդգծել է Վարդանյանը:
