Արարատյան հայրապետական թեմի առաջնորդ Նավասարդ արքեպիսկոպոս Կճոյանը հեռահար ձեւով է տեղյակ իրեն կարգալույծ անելու նպատակով մեկնարկած ստորագրահավաքին եւ դա համարում է անպտղաբեր գործ: Այս մասին NEWS.am-ի թղթակցի հետ զրույցում ասաց Նավասարդ Կճոյանը: Ներկայացնում ենք  նրա հետ մեր կարճ զրույցը:

Տեղյա՞կ եք ձեզ կարգալույծ անելու պահանջով մեկնարկած ստորագրահավաքի մասին:

Հեռահար ձեւով:

Ինչպե՞ս եք վերաբերում եւ մեկնաբանում այդ ամենը:

Ով մտածել է, թող նա էլ մեկնաբանի, մեկնաբանություն չունեմ, դա մեկնաբանելու թեմա չէ:

Մտահոգվելու, վախենալու առիթ ունե՞ք:

Իսկ դուք ունե՞ք:

Ոչ,ես չունեմ:

Ես էլ չունեմ:

Կարծում եք` ակցիայի կազմակերպիչները հաջողության կհասնե՞ն, որովհետեւ հայտնել էին, որ 2500 ստորագրություն կա այդ փաստաթղթի տակ:

Ես չպետք է խոսեմ այդ մասին:

Մեկնարկած ստորագրահավաքի եւ պահանջի հարցով խոսե՞լ եք Կաթողիկոսի հետ:

Չեմ խոսել:

Պատրաստվո՞ւմ եք խոսել նրա հետ:

Ինչի՞ համար խոսեմ:

Եթե այս բողոքի ալիքը զանգվածային դառնա, ի՞նչ եք պատրաստվում անել:

Քեզնից խորհուրդ կհարցնեմ:

Ես դժվար կարողանամ ձեզ ճիշտ խորհուրդ տալ, Սրբազան:

Դե կմտածենք:

Մտահոգվելու բան չունե՞ք: Նրանց չի՞ հաջողվի ձեզ կարգալույծ անել:

Դուք եկեղեցական օրենքները գիտե՞ք, եկեղեցին աշխարհիկ հաստատություն չէ: Ես կարծում եմ, որ դա անպտղաբեր գործ է: Կներեք, ձագուկ ջան, ես Փելեշյանի միջոցառմանն եմ գնում, եկեք դադարեցնենք այս զրույցը:

Հիշեցնենք, որ հուլիսի 12-ից սկսած, ամեն օր` առավոտյան ժամը 10:00-ից  մինչեւ 21:00-ն, Հյուսիսային պողոտա- Թումանյան խաչմերուկում անց է կացվելու ստորագրահավաք` Արարատյան հայրապետական թեմի առաջնորդ Նավասարդ արքեպիսկոպոս Կճոյանին կարգալույծ անելու` Ն.Ս.Օ.Տ.Տ. Գարեգին Բ Ամենայն Հայոց Կաթողիկոսին ուղղված պահանջով:  Ստորագրահավաքի նախաձեռնողն է «Մենք ենք մեր երկրի վաղվա տերը» միությունը` ԵՊՀ շրջանավարտ Հովհաննես Ղահրամանյանի գլխավորությամբ: Կոչի տակ արդեն կա 2500-ից ավելի ստորագրություն` հավաքված հուլիսի սկզբից:

«Նավասարդ Կճոյան հոգեւորականը ամբողջովին հեռացել է եկեղեցուց եւ ներքաշվել գողական կյանքի մեջ: Այս մարդուն իր Բենթլիով կարելի է տեսնել միմիայն մեծ բիզնեսի ներկայացուցիչների կողքին: Ո՞վ է երբեւէ Կճոյանից հոգեւոր հարցերի, իր հոտի խնդիրների մասին գեթ մեկ բառ լսել: Ո՞վ է նրան գեթ մեկ անգամ տեսել եկեղեցու կողքին: Այս մարդը դարեր շարունակ մեր ազգի ինքնությունը պահպանած եկեղեցու վերջին մեղքն է, նրա խայտառակությունը:

Կճոյանն այնքան է ներքաշվել գողական կյանքի մեջ, որ, բացի օֆշորային սկանդալից, իր մաֆիոզի դիրքին հարիր չի համարում պարզաբանել իրեն  ուղղված հարցերը: Իր պահվածքով Կճոյանը խայտառակում է մեր ազգը, եւ, եթե Կաթողիկոսը որեւէ կերպ չարձագանքի Կճոյանին կարգալույծ անելու մեր պահանջին, ուրեմն ինքը եւս նույն մաֆիայի մաս է կազմում` դրանից բխող բոլոր հետեւանքներով: Հրավիրում ենք Հայ եկեղեցու ճակատագրով բոլոր մտահոգ մարդկանց վաղվանից սկսած մասնակցելու ստորագրահավաքին»,-ասված է միության հայտարարության մեջ: 

Ինգա Մարտինյան