նախընտրելի դարձնել
Բուլղարիայի պատգամավորներն այս առավոտ աշխատանքի չեն ներկայացել՝ գիշերը Սոֆիայում անցկացված բողոքի զանգվածային ցույցի պատճառով, որի մասնակիցները որոշ ժամանակով արգելափակել էին խորհրդարանի ելքը, հայտնում է բուլղարական Novinite գործակալությունը:
Ըստ նրա՝ պատգամավորներին աշխատանքի չներկայանալու կոչ է արել խորհրդարանի նախագահ Միխայիլ Միկովը:
Գործակալությունը գրում է, որ խորհրդարանականները աշխատանքը կվերսկսեն իրավիճակի կայունացումից հետո, հայտնում է «ՌԻԱ Նովոստին»:
Գիշերը բողոքի ցույցի մասնակիցները արգելափակել էին խորհրդարանի ելքը՝ մայթերի սալիկներով եւ աղբամաններով արգելապատնեշներ ստեղծելով: Շենքում 100-ից ավելի մարդ է գտնվում, որոնց թվում կան կառավարության անդամներ եւ լրագրողներ: Սոֆիայի ոստիկանությունը միայն առավոտվա կողմ է կարողացել քանդել պատնեշները եւ ժամը 05:00-ին մարդկանց շենքից դուրս բերել: Ոստիկանները ցուցարարներին խմբերի են բաժանել ու ձեռնամուխ եղել պատնեշների վերացմանը: Հակակառավարական ցույցի ընթացքում տուժել է 10 մարդ:
Բուլղարիայում ցույցը սկսվել էր 40 օր առաջ՝ մեդիամագնատ Դելյան Պեեւսկիին ազգային անվտանգության պետական ծառայության ղեկավար նշանակելուց հետո:
Բողոքի ցույցերը սկսելուց հետո Պեեւսկին հայտարարել էր, որ պատրաստ է հրաժարական տալ, սակայն ցուցարարները շարունակել էին բողոքել՝ պահանջելով ամբողջ կառավարության հրաժարականը:
