նախընտրելի դարձնել
Սիմոն Վիզենտալի իսրայելյան կենտրոնը Եվրոպայում ողջ մնացած նացիստ հանցագործների որոնում է սկսել: Նախկին նացիստների գտնվելու վայրի մասին տեղեկության համար շռայլ պարգեւ է նախատեսվում:
Կազմակերպությունը հայտնել է, որ Բեռլինում, Համբուրգում եւ Քյոլնում նախաձեռնությանն աջակցելու կոչերով պաստառներ են տեղակայվել՝ «Ուշ է: Բայց շատ ուշ չէ: Վերջին հնարավորություն II օպերացիա» կարգախոսով:
Բացի այդ, նման միջոցառումներ կանցկացվեն Ավստրիայում, Լեհաստանում, Ռումինիայում, Հունգարիայում, Խորվաթիայում, Լիտվայում, Էստոնիայում եւ Լատվիայում, հայտնում է Deutsche Welle-ն:
Սիմոն Վիզենտալի կենտրոնի ղեկավար Էֆրայիմ Զուրոֆֆի խոսքով՝ նախաձեռնությունն ակնկալում է եվրոպական երկրների աջակցությունը՝ պատժից խուսափած նացիստ հանցագործներին հայտնաբերելու եւ իրավապահներին հանձնելու հարցում:
Օգտակար տեղեկության համար կազմակերպությունը 25 000 եվրո պարգեւավճար է խոստանում: Ընդ որում՝ նախկին նացիստների տարիքը քրեական հետապնդումը դադարեցնելու պատրվակ չի կարող լինել: «Դա նրանց մեղքը չի նվազեցնում», - ընդգծել է Զուրոֆֆը:
