Քուվեյթում ՀՀ դեսպան Ֆադեյ Չարչօղլյանը սեպտեմբերի 2-ին, հանդիպել է  Քուվեյթի Պետության բարձրագույն կրթության եւ դաստիարակության հարցերի նախարար դոկտոր Նայֆ Ֆալլահ Ալ-Հաջրաֆի հետ եւ քննարկել փոխգործակցության հետագա խթանման հեռանկարները:

ԱԳՆ մամուլի ծառայությունից հայտնում են, որ դեսպանը շնորհավորել է պարոն Ալ-Հաջրաֆին նախարարի պաշտոնում վերանշանակվելու  կապակցությամբ:

Հանդիպման ընթացքում ընդգծվել է  կրթության եւ գիտության ոլորտներում երկու երկրների հարաբերություններում արձանագրված առաջընթացը:

Զրուցակիցները գոհունակություն են հայտնել միջբուհական համագործակցության ներկա մակարդակից՝ պատրաստակամություն հայտնելով առավելագույն ջանքեր գործադրել այն որակական նոր մակարդակի հասցնելու համար:

Նույն օրը դեսպան Չարչօղլյանը հանդիպել է Քուվեյթի արդարադատության, վակֆերի եւ իսլամական հարցերի նախարար Շարիդա Աբդալլահ Ալ-Մաուշարջի հետ: Քննարկվել են արդարադատության բնագավառում երկու երկրների միջեւ  համագործակցության ծավալման եւ ընդլայնման հեռանկարները:

Սեպտեմբերի 3-ին Քուվեյթում ՀՀ դեսպանը հանդիպել է Քուվեյթի Ազգային ժողովի նորընտիր նախագահ Մարզուկ Ալի Ալ-Ղանեմի հետ: Դեսպանը շնորհավորել է Մարզուկ Ալ-Ղանեմին Ազգային ժողովի նախագահի պաշտոնում ընտրվելու կապակցությամբ եւ փոխանցել ՀՀ Ազգային ժողովի նախագահ Հովիկ Աբրահամյանի շնորհավորական ուղերձը:

Հանդիման ընթացքում քննարկվել են Հայաստանի եւ Քուվեյթի միջեւ միջխորհրդարանական համագործակցության ընդլայնման հնարավորությունները: Զրուցակիցներն անդրադարձել են Քուվեյթի Ազգային ժողովի նախկին նախագահ Ալի Ռաշեդի՝ Հայաստան այցելության արդյունքներին ու ձեռք բերված պայմանավորվածությունների կատարման ընթացքին:

Երկուստեք  ընդգծվել է միջխորհրդարանական բարեկամություն խմբերի միջեւ շփումների ակտիվացման եւ շարունակականության ապահովման, պատվիրակությունների փոխայցելությունների ակտիվացման, երկու երկրների օրենսդիր կառույցների միջեւ իրավապայմանագրային բազայի ընդլայնման  կարեւորությունը: