Ծաղկաձորում անց է կացվում Աշխարհաքաղաքական եւ ազգային ինքնության հարցերով միջազգային գիտա-գործնական կոնֆերանս, որին մասնակցում են հայ եւ ռուս գիտնականներ:  Կոնֆերանսը սկսվել է հոկտեմբերի 14-ին եւ կտեւի մինչեւ հոկտեմբերի 20-ը:  

Կոնֆերանսի կազմակերպիչներն են Ռուսաստանի գիտությունների ակադեմիայի Սոցիոլոգիայի ինստիտուտը, Հայաստանի ԳԱԱ-ն, Հայաստանում «Ռոսսոտրուդնիչեստվո»-ի ներկայացուցչությունը, Հարավային դաշնային համալսարանը, ԵՊՀ-ն: 

NEWS.am-ին «Ռոսսոտրուդնիչեստվո»-ի  ներկայացուցչության մամուլի ծառայության ղեկավար Լիանա Ազոյանը հայտնել է, որ մասնակիցները կայցելեն «Ծիծեռնակաբերդ», ծաղկեպսակներ կդնեն գեներալ Պասկեւիչի, Գրիբոյեդովի եւ Քանաքեռում կազակների հուշարձաններին:

Կոնֆերանսի համանախագահներն են պրոֆեսոր, Հարավային դաշնային համալսարանի ամբիոնի վարիչ, ՌԳԱ-ի Սոցիոլոգիայի ինստիտուտի Հարավռուսական մասնաճյուղի տնօրեն, ՌԴ-ի գիտությունների վաստակավոր գործիչ Յուրի Վոլկովը,  ՌԳԱ-ի ակադեմիկոս, ՌԳԱ-ի Սոցիոլոգիայի ինստիտուտի տնօրեն Միխայիլ Գորշկովը,  Հայաստանում ՌԴ դեսպանատան խորհրդական եւ  «Ռոսսոտրուդնիչեստվո»-ի  ներկայացուցչության ղեկավար Վիկտոր Կրիվոպուսկովը, ՀԳԱԱ-ի  Փիլիսոփայության, սոցիոլոգիայի եւ իրավունքի ինստիտուտի տնօրեն, Հայաստանի սոցիոլոգների կազմակերպության նախագահ Գեւորգ Պողոսյանը, ԵՊՀ ռեկտոր Արամ Սիմոնյանը, Հարավային դաշնային համալսարանի  դեկաններից  Անտոն Սերիկովը: 

Կոնֆերանսի մասնակիցները կայցելեն նաեւ Հայաստանի պատմական եւ տեսարժան վայրեր: