Սիրահարների այգում այսօր՝ նոյեմբերի 1-ից, մեկնարկել է ամենամյա «Բացօթյա ընթերցանության փառատոնը»։ Այն իրականացվում է Հայաստանի երիտասարդական հիմնադրամի եւ «Ֆլեշմոբ Դիվիզիա» երիտասարդական ՀԿ-ի նախաձեռնությամբ եւ ՀՀ մշակույթի նախարարության աջակցությամբ:

Նոյեմբերի 1-3-ն անցկացվող «Բացօթյա ընթերցանության փառատոնի» նպատակն է միավորել երիտասարդությանը, ամրապնդել ընթերցելու մշակույթը եւ սերը գրքի հանդեպ:

«Բացօթյա ընթերցանության փառատոն» ծրագրի համակարգող Էդուարդ Լեւանյանը նշել է. «Ծրագրի նպատակն է խրախուսել ընթերանությունը, ապահովել երիտասարդների կապը գրքի հետ: Փառատոնից փառատոն մասնակիցների թիվն աճում է: Իսկ ՀԵՀ-ի հետ համագործակցությունն իր դրական ազդեցությունն է բերում փառատոնի աշխատանքներին, քանի որ ինչքան շատ կազմակերպությունների հետ համագործակցենք, այնքան ավելի մեծ կլինի փառատոնի դերն ու կարեւորությունը»:

Այսօր Սիրահարների այգում երիտասարդները տեղադրում էին գրապահարաններ, այգու տարբեր այցելուներ ծանոթանում էին ցուցադրված գրականությանը:

Վաղը` նոյեմբերի 2-ին, ժամը 14.00-ից կմեկնարկի գրքի բացօթյա ցուցահանդես, իսկ երեկոյան սպասվում են երիտասարդ կատարողների համերգ, մանկական ներկայացումներ: