ՆախընտրելիԸստ Վաշինգթոնի գնահատականի` Ռուսաստանի դեմ պատժամիջոցները զգալի ազդեցություն են ունեցել: ԱՄՆ ֆինանսների նախարարի օգնական Դենիել Գլեյզերը Կոնգրեսի լսումներին հայտնել է, որ պատժամիջոցների հետեւանքով Ռուսաստանից կապիտալի զգալի արտահոսք է տեղի ունեցել, որը զրոյի է հավասարեցրել ռուսական ՀՆԱ-ի աճը:
Գլեյզերը սպառնացել է ուժեղացնել պատժամիջոցները, եթե Մոսկվան չդադարի միջամտել Ուկրաինայի ներքին գործերին: Ըստ նրա` պատժամիջոցների ողջ շարքը կիրառելու դեպքում հնարավոր կլինի «բացահայտել Ռուսաստանի տնտեսության թուլությունը եւ խոցելիությունը», փոխանցում է Deutsche Welle-ի ռուսական ծառայությունը` վկայակոչելով AFP-ն:
Գլեյզերը նաեւ նշել է, որ Ռուսաստանն արդեն զգացել է իր դեմ իրականացվող ԱՄՆ-ի տնտեսական քաղաքականության հետեւանքները: Նա պատժամիջոցների հետ է կապել ռուսական ֆոնդային բորսայում բաժնետոմսերի գնի 13 տոկոս անկումը եւ Կենտրոնական բանկի հարկադիր քայլը, որը 50 միլիարդ դոլար էր ծախսել` ռուբլին ամրագրելու համար: Մոսկվայի համար վարկերի սակագներն այնքան են բարձրացել, որ երկրի կառավարությունն ստիպված է եղել ապրիլի 23-ին դադարեցնել պարտամտոմսերի վաճառքը:
Ըստ Գլեյզերի հրապարակած տվյալների` 2014 թ. Ռուսաստանից կապիտալի արտահոսքը հասել է 100-130 միլիարդ դոլարի: Ընդ որում` Գլեյզերը պնդում է, որ ՌԴ նախագահ Վլադիմիր Պուտինի մտերիմների միջոցները կառավարող «Ռոսիա» բանկը պատժամիջոցների պատճառով կորցրել է միլիարդ դոլար:
