ԱՄՆ ընկերությունները սկսել են տեղափոխել Իրաքի Բալադ քաղաքի մերձակայքում գտնվող խոշոր ավիաբազայում աշխատող իրենց հարյուրավոր քաղաքացիների, փոխանցում է Agence France-Presse-ը` վկայակոչելով ԱՄՆ Պետդեպարտամենտի ներկայացուցիչ Ջեն Պսակիին:

«Մենք հաստատում ենք, որ Իրաքում պայմանագրով աշխատող ԱՄՆ քաղաքացիները ժամանակավորապես տեղափոխվել են այդ շրջանից` անվտանգության նկատառումներից ելնելով», — հայտարարել է Պսակին:

ԱՄՆ պաշտպանության նախարարության ներկայացուցիչը հաստատել է, որ հարյուրավոր ամերիկացիներ Բալադից Բաղդադ են ուղարկվել, փոխանցում է Gazeta.ru-ն:

Բազայի տարածքից մարդկանց տարհանոմը տեղի է ունենում Իրաքի քաղաքները «Իրաքի եւ Լեւանտի իսլամական պետություն» ահաբեկչական խմբավորման գրոհայինների կողմից գրավելուն զուգահեռ: Հունիսի 10-ին գրոհայինները  վերահսկողության տակ են վերցրել  Մոսուլը: Մեկ օր անց գրոհայինները զավթել էին նաեւ Տիկրետը: