Արցախի Հանրապետության  վարչապետ Արա Հարությունյանն այսօր բերքահավաքի աշխատանքների ընթացքի վերաբերյալ հրավիրել է  խորհրդակցություն:

Խորհրդակցությանը մասնակցում էին ԼՂՀ փոխվարչապետ Արթուր Աղաբեկյանը, գյուղատնտեսության նախարար Անդրանիկ Խաչատրյանը, կառավարության աշխատակազմի ղեկավար Լեւոն Գրիգորյանը եւ շրջվարչակազմերի ղեկավարները:

Ա. Հարությունյանը, նախ, շրջվարչակազմի ղեկավարներից  հետաքրքրվել է բերքահավաքի ընթացքի, խոտի մթերման, ինչպես նաեւ առկա խնդիրների մասին:

Այնուհետեւ գյուղնախարար Ա. Խաչատրյանը բերքահավաքի աշխատանքների վերաբերյալ հանդես է եկել ամփոփ զեկույցով: Նրա խոսքով՝ հանրապետության տարածքում այս տարվա մշակված ավելի քան 62 հազար հեկտար հացահատիկային մշակաբույսերի ցանքատարածություններից ընդհանուր առմամբ արդեն կատարվել է շուրջ 11 հա գարու եւ ցորենի հունձ: Բերքատվության միջին ցուցանիշը, ըստ նախարարի, ներկա դրությամբ, կազմել է հեկտարից 9.8 ց՝  այդ թվում՝ գարու միջին բերքատվությունը՝ 8.9 ց, իսկ ցորենինը՝ 13.6 ց: Նա ընդգծել է, որ բերքատվության մակարդակն աճելու միտում ունի, եւ տարվա վերջնական ցուցանիշը, ի համեմատ ներկա միջանկյալի, ավելի բարձր է ակնկալվում: Նախարարի խոսքով, երաշտը մեծ վնաս է հասցրել դաշտերին. այդ պատճառով այս տարի հացահատիկայինների մասով կանխատեսվում են բերքատվության ցածր ցուցանիշներ՝ նախորդ տարվա համեմատ:

Ըստ զեկույցի՝ դաշտերում ներկայումս աշխատում է 192 կոմբայն, եւ բերքահավաքի աշխատանքներում գյուղտեխնիկայի խնդիր չկա:

Ա. Խաչատրյանը զեկուցել է նաեւ ձեւավորված գների մասին՝ նշելով, որ, մասնավորապես, ցորենը դաշտում արտադրողից գնում են  կիլոգրամը 145 դրամով, իսկ տեղափոխման դեպքում  ալրաղացների եւ այլ տնտեսվարող սուբյեկտների կողմից ընդունվում է 150 դրամով եւ ավելի բարձր գներով՝ կախված ցորենի որակից: Վարչապետը հանձնարարել է վերահսկել գործընթացը եւ խնդիրների դեպքում օպերատիվ արձագանքել:

Խորհրդակցության ընթացքում Ա. Հարությունյանը, անդրադառնալով զոհված ազատամարտիկների ընտանիքների բնակարանային բարելավման հիմնախնդիրներին, նշել է, որ բարերար Վարուժան Գրիգորյանի կողմից 150 մլն. դրամ է հատկացվել այդ նպատակով: Վարչապետը հանձնարարել է շրջվարչակազմերի ղեկավարներին ըստ առաջնահերթության վերջնականացնել կարիքավոր ընտանիքների ցանկերը եւ զբաղվել աջակցության հատկացմամբ: Գործադիրի ղեկավարը հավելել է, որ ծրագրի ավարտին իր վերահսկողական ծառայությունը  համապատասխան ստուգումներ է անցկացնելու գումարների նպատակային օգտագործման ուղղությամբ: