Հայաստանում կենսաթոշակային բարեփոխումը հակաիրավական է , հունիսի 23-ին լրագրողներին հայտնել է Հայաստանի դեմոկրատական կուսակցության ղեկավար Արամ Սարգսյանը:   Սկզբում քաղաքացիներին փորձեցին մոլորեցնել «պարտադիր, բայց ոչ  պարտադրված» հնչեղ արտահայտությամբ, սակայն թե ինչով է այն  «ոչ  պարտադրված», անհասկանալի է, եթե վաղ թե ուշ նոր համակարգին պետք է անցնեն բոլորը, հավելել է նա: 

Մյուս հակաիրավական քայլը պարտադիր սոցիալական վճարը ներդնելն էր, հավելել է Սարգսյանը: «Ի՞նչ իրավունքով է դա արվել: Չէ՞ որ նախկինում մենք արդեն վճարում էինք սոցիալական վճարներ, որոնք ընդգրկված են եկամտահարկում: Իսկ այժմ դրանք նորից են սահմանել», - հայտարարել է Սարգսյանը:

Նկատենք, որ «Կուտակային կենսաթոշակների  մասին» օրենքում  փոփոխություններն ընդունվել են հունիսի 21-ին` խորհրդարանի արտահերթ նիստում:  Ոչ իշխանական խորհրդարանական ուժերի քառյակի հիմնական դժգոհությունների պատճառն այն է, որ օրենքում պարտադիր կուտակային վճարումները ֆինանսական առումով պահպանվել են, փոխվել է միայն նրանց ձեւակերպումը. դրանք վերածվել են պարտադիր սոսիալական վճարների պետաշխատողների համար: Մասնավոր հատվածի աշխատողների համար դրանք ուժի մեջ կմտնեն 2017 թ. հուլիսի 1-ից: