նախընտրելի դարձնել
Այս տարվա աշնանը Հայաստանում դռները կբացի առաջին «Carrefour» սուպերմարկետը: Այս մասին հուլիսի 11-ին Ֆրանսիայի դեսպանատանը Ֆրանսիայի ազգային տոնի առթիվ (Բաստիլի գրավման օրվա) կազմակերպված տոնական մամուլի ասուլիսում հայտարարել է ՀՀ-ում Ֆրանսիայի արտակարգ եւ լիազոր դեսպան Անրի Ռենոն:
Դիվանագետը հիշեցրել է, որ նախագահ Ֆրանսուա Օլանդի ՀՀ այցի ընթացքում տարաբնույթ համաձայնագրեր էին ստորագրվել, այդ թվում՝ միջկառավարական պայմանագրեր: Ստորագրվել էին նաեւ ձեռնարկությունների մակարդակով համաձայնագրեր: «Ընդամենը երկու օր առաջ ՀՀ-ում Ֆրանսիայի դեսպանատանը կայացավ շատ կարեւոր միջոցառում՝ ֆրանսիացի գործարարների մասնակցությամբ:
Հայ-ֆրանսիական բիզնես ակումբը Հոգաբարձուների խորհրդի նիստ անցկացրեց, որի ընթացքում Քրիստիան դը Նալը, ով «Carrefour» ընկերության ներկայացուցիչն է Հայաստանում, ընտրվեց Հայ-ֆրանսիական բիզնես ակումբի նախագահ», - նշել է Անրի Ռենոն: Դեսպանը հավելել է, որ դրա նպատակը ոչ միայն հայ-ֆրանսիական տնտեսական կապերն ամրացնելն է, այլեւ այնպես անելը, որ տնտեսական հարաբերությունները կարողանան հասնել այն մակարդակին, որում գտնվում են երկու երկրների քաղաքական հարաբերությունները:
Հիշեցնենք, մայիսի 13-ին ՀՀ նախագահ Սերժ Սարգսյանը եւ պետական այցով Հայաստան ժամանած Ֆրանսիայի նախագահ Ֆրանսուա Օլանդը այցելել էին «Carrefour» սուպերմարկետի շինհրապարակ, որը կբացվի «Yerevan Mall» առեւտրի կենտրոնում, եւ ծանոթացել աշխատանքների ընթացքին:
