Ութ պաղեստինցի է զոհվել Գազայի հատվածում Իսրայելի բանակի ցամաքային գործողությունն սկսելուց հետո: Ըստ նախնական տվյալի` զոհերի շարքում կա երեք ամսական տղա:

Միաժամանակ Իսրայելի իշխանությունները զինվորականներին հրամայել են պատրաստվել ցամաքային գործողության ընդլայնմանը: Գործողությանը մասնակցում են ավիացիան եւ ռազմածովային ուժերը: 

Իսրայելի կառավարության մամուլի քարտուղար Մարկ Ռեգեւը հայտարարել է, որ ներխուժման նպատակն է պաղեստինցի գրոհայինների կողմից զենք տեղափոխելու համար փորած ստորգետնյա թունելների ոչնչացումը: Իշխանություններն ընդգծել են, որ գլխավոր խնդիրն է ռազմական առումով թուլացնել ՀԱՄԱՍ-ը, այլ ոչ թե  խմբավորումն իշխանությունից հեռացնելը:

ՄԱԿ-ի գլխավոր քարտուղար Բան Կի-Մունը դատապարտել է ռազմական գործողությունների վերսկսումը: Նա ՀԱՄԱՍ-ին կոչ է արել անմիջապես դադարեցնել Իսրայելի ռմբակոծումը, իսկ Թել Ավիվին` հրաժարվել ռազմական գործողությունից,  եւ խնդրել է անել հնարավոր ամեն ինչ` քաղաքացիներին, ՄԱԿ-ի սեփականությունը եւ անձնակազմին պաշտպանելու համար:

ԱՄՆ պետքարտուղար Ջոն Քերրին էլ Իսրայելի վարչապետ Բենյամին Նեթանյահուի հետ  հեռախոսազրույցում  կոչ է արել զերծ մնալ Գազայի հատվածում բռնությունը թեժացնելուց, սակայն նշել է, որ Իսրայելը պաշտպանվելու իրավունք ունի: