Հայաստանի եւ Ադրբեջանի նախագահների առաջիկա հանդիպումից կարելի ակնկալել ճակատային գծում իրավիճակը հանդարտեցնելու եւ բանակցային սեղանի շուրջ փոխընդունելի լուծումների փնտրտուքը շարունակելու վերաբերյալ հավաստիացումներ: Նման կարծիք է հայտնել ԼՂՀ ԱԳ նախկին նախարար Արման Մելիքյանը:

Նրա խոսքով՝ շփման գծում իրավիճակի սրումը կապված է Ալիեւի կողմից ճամբարի ընտրության վերաբերյալ որոշումը հետաձգելու ցանկության հետ՝ նա պետք է հստակ ասի, արդյոք Ռուսաստանի կողքին է, թե նախընտրում է անցնել Արեւմուտքի ճամբարը: «Առայժմ նա գերադասում է ժամանակ ձգել ճակատային գծում զինված միջադեպեր հրահրելով: Հանդիպման կազմակերպմանը, այդպիսով, մասնակցեցին բոլոր համանախագահները՝ Ֆրանսիան հանդես եկավ այն կազմակերպելու առաջարկով, ԱՄՆ հորդորեց այդ հանդիպումը հնարավորինս արագ կազմակերպել, իսկ Ռուսաստանն էլ առաջարկեց այն անցկացնել Երեւանից ու Բաքվից ոչ շատ հեռու գտնվող Սոչիում՝ հավանաբար չցանկանալով, որ պարոնայք Ալիեւն ու Սարգսյանը ճանապարհի վրա շատ ժամանակ ծախսեն»,-նշել է Մելիքյանը:

«Կարգավորման գործընթացում, առկա բանակցային հիմնադրույթների կիրառմամբ խաղաղ լուծում ակնկալելն իրատեսական չէ, սակայն խաղաղության պահպանման հեռանկարի տեսանկյունից՝ բանակցային գործընթացն արժե, որ շարունակվի, մինչեւ նոր գաղափարների ի հայտ գալը: Այս պահին բոլոր երրորդ պետությունները կգերադասեն համահավասար հեռավորություն պահպանել հակամարտության կողմերի հանդեպ եւ դիտարկել վերջիններիս միեւնույն հարթությունում»,-ամփոփել է ԼՂՀ ԱԳ նախկին նախարարը: