Մեղադրանք է առաջադրվել Կենտրոն վարչական շրջանի ղեկավարի աշխատակազմի կոմունալ տնտեսության եւ բազմաբնակարան շենքերի կառավարման մարմինների հետ աշխատանքների կազմակերպման բաժնի նախկին պետ Գ.Սարգսյանին:

ՀՀ քննչական կոմիտեի տեղեկատվության եւ հասարակայնության հետ կապերի բաժնից հայտնում են, թե Երեւան քաղաքի քննչական վարչության վարույթում քննվող քրեական գործի շրջանակներում այսօր մեղադրանք է առաջադրվել Կենտրոն վարչական շրջանի ղեկավարի աշխատակազմի կոմունալ տնտեսության եւ բազմաբնակարան շենքերի կառավարման մարմինների հետ աշխատանքների կազմակերպման բաժնի նախկին պետ Գ.Սարգսյանին՝ ՀՀ քրեական օրենսգրքի 308-րդ հոդվածի 2-րդ մասով՝ պաշտոնեական լիազորություններն անցնելու համար, որն առաջացրել է ծանր հետեւանքներ։

2009թ. օգոստոսին հաստատված բաժնի կանոնադրության համաձայն՝ Գ.Սարգսյանը պատասխանատու է եղել Երեւան քաղաքի Կենտրոն վարչական շրջանի փողոցների, հրապարակների, բնակավայրերի կանաչապատման, աղբահանության աշխատանքների կազմակերպման, ինչպես նաեւ՝ այդ կապակցությամբ բաժնի աշխատակիցների գործունեության նկատմամբ ղեկավարում եւ հսկողություն իրականացնելու համար։

Սակայն, քրեական գործով ձեռք բերված ապացույցների համաձայն, Գ.Սարգսյանը, պաշտոնեական լիազորությունները չարաշահելով, չի կատարել իր ծառայողական պարտականությունները, որոնց հետեւանքով «Կենտրոն Մաքրություն» ՓԲԸ աշխատակիցները, օգտվելով իրենց գործունեության նկատմամբ պատշաճ հսկողության բացակայության հանգամանքից, 2008-2013թթ. ընթացքում ձեւականորեն գրանցել են աշխատանքի չհաճախող շուրջ 115 հավաքարարների եւ այլ աշխատակիցների, չեն կատարել պայմանագրով նախատեսված` Երեւանի Կենտրոն վարչական շրջանի՝ շուրջ 132 փողոցների ամենօրյա սանիտարական մաքրման աշխատանքները:

Չնայած դրան՝ Գ.Սարգսյանն իր ստորագրությամբ, ըստ քրեական գործի նյութերի, 2008-2013թթ. ընթացքում հաստատել է «Կենտրոն Մաքրություն» ՓԲԸ-ի կողմից փաստացի ողջ ծավալով չկատարված, պայմանագրով նախատեսված աշխատանքների վերաբերյալ կազմված կեղծ կատարողական ակտերը, որի հիման վրա հիշյալ ընկերությունը նույն ժամանակահատվածում Երեւանի քաղաքապետարանի բյուջեից ստացել է շուրջ 298 մլն ՀՀ դրամ:

Արդյունքում՝ առերեւույթ հանցագործություն կատարելու մեջ մեղադրվող անձի կողմից իր լիազորությունները դիտավորությամբ չկատարելու հետեւանքով «Կենտրոն Մաքրություն» ՓԲ ընկերության ղեկավարության կողմից հիշյալ առանձնապես խոշոր չափերի գումարը հափշտակվել է՝ պետության օրինական շահերին պատճառելով ծանր վնաս:

Քրեական գործով նախաքննությունը շարունակվում է։