«Շրջանառության հարկի մասին» ՀՀ օրենքի դեմ բողոքող գյումրեցի առեւտրականներին ուղղորդում են ընդդիմության ներկայացուցիչները, իսկ պատգամավորներին հանդիպման կանչելու պահանջը ժողովրդինը չէ, այլ հենց ընդդիմադիր ուժերինը: NEWS.am-ի հետ զրույցում վստահ հայտարարեց Շիրակից մեծամասնականով ընտրված ՀՀԿ-ական Աշոտ Աղաբաբյանը:

«Նախ ասեմ, որ մենք Ազգային ժողովի նիստերից չենք կարող դուրս գալ ու գնալ Գյումրի, հետո անիմաստ է փողոցում պայքարելը: Օրենքը շատ լավն է, բիզնեսին ընդհանրապես չի խանգարում, բացի դրանից էլ մենք Ազգային ժողովում այս հարցը քննարկում ենք, այնպես որ սխալ է փողոց դուրս գալը: Ինքս առաջարկում եմ, որ մի քանի ներկայացուցիչ մոտենա մարզպետարան, որտեղ իրենց կբացատրեն, թե օրենքն ինչքանով է լավը»,- ասաց ՀՀԿ-ական պատգամավորը:

Աղաբաբյանը շարունակեց պնդել, որ ցույց անելը ճիշտ երեւույթ չէ, առավել եւս որ նրանց ուղղորդում է քառյակը: Պատգամավորը սխալ է համարում հավաքվել, բողոքի ակցիաներ անելը՝ դրա փոխարեն առաջարկելով հանդիպում մարզպետարանի համապատասխան աշխատակցին եւ հասկանալ օրենքի առավելությունները:

«Ինչ վերաբերվում է «պահանջում ենք պատգամավորներին», դա ժողովրդի խոսքը չէ, այլ ընդդիմադիրներինը»,- ավելացրեց Աշոտ Աղաբաբյանը:

Նշենք, որ Գյումրիում մանր ու միջին բիզնեսով զբաղվող գրեթե բոլոր առեւտրականները  արդեն 3-րդ օրն է հավաքվում են քաղաքի կենտրոնական շուկայի մոտ, փակում կենտրոնական փողոցներն ու պահանջում հանդիպում համապատասխան մարմինների հետ: Հոկտեմբերի 1-ին հավաքվածները պահանջել էին հանդիպում պատգամավորների հետ:

«Մենք պահանջում ենք մեր պատգամավորներին, որոնց ընտրել ենք ժամանակին: Թող գան, մեր նեղ օրվան մեր կողքին կանգնեն ու տան մեր օրվա հացի կռվի պատասխանը»,- զայրացած ասել են առեւտրականները:

Ի դեպ, գյումրեցիների հետ հանդիպման եկավ միայն ԲՀԿ-ական Մարտուն Գրիգորյանը:

Հիշեցնենք, որ 2014թ. հոկտեմբերի 1-ից ուժի մեջ է մտնում «Շրջանառության հարկի մասին» ՀՀ օրենքը, ըստ որի տոնավաճառների աշխատողները իրենց ապրանքաշրջանառության վերաբերյալ փաստաթղթեր պետք է ներկայացնեն հարկային մարմնին։ Նոր փոփոխությամբ՝ առաջին անգամ փաստաթուղթ չներկայացնելու դեպքում ձեռնարկությունը նախազգուշացում է ստանում, երկրորդ անգամ՝ տուգանվում 20 հազար դրամի չափով, երրորդ անգամ՝ շրջանառության հարկի 5 տոկոսի չափով: Կառավարությունը նոր օրենքը հիմնավորում է խոշոր բիզնեսը հարկային դաշտ բերելու անհրաժեշտությամբ։