նախընտրելի դարձնելՀՔԱ Վանաձորի գրասենյակ իր իրավունքների պաշտպանության համար դիմել է «Սեւանի պոլիկլինիկա» ՊՓԲԸ-ի նախկին ֆինանսիստ Գ. Բ.-ն, ում ներկայացրած խնդիրը, ինչպես պարզվեց, շատ ավելի խորն արմատներ ունի, քան կարելի էր պատկերացնել:
Այս առնչությամբ ՀՔԱ Վանաձորի գրասենյակի տարածած հաղորդագրությունում ասվում է.
«Սեւանի պոլիկլինիկա» ՊՓԲԸ-ի գլխավոր ֆինանսիստ Գ. Բ.-ի աշխատանքից ազատման համար որպես հիմք հանդիսացել է Գեղարքունիքի մարզպետարանի վերստուգող Սոնյա Սիմոնյանի կողմից իրականացված ստուգման արդյունքում բացահայտված խախտումը:
Ինչպես հետագայում հարուցված քրեական գործի շրջանակներում է պարզվել, ֆինանսիստը որեւէ խախտում չի կատարել: Այս առումով արդարությունը վերականգնվել է, սակայն հենց նույն քրեական գործի շրջանակներում թույլ են տրվել մի շարք ակնհայտ խախտումներ: Այսպես, ՀՀ Ոստիկանության Քննչական գլխավոր վարչության Գեղարքունիքի մարզի քննչական բաժնի Սեւանի քննչական բաժանմունքում 2013 թ. առաջին կիսամյակի աշխատանքային ծրագրով նախատեսված հիմքով ուսումնասիրվել են «Սեւանի պոլիկլինիկա» ՊՓԲԸ-ի դեմ ներկայացված դատական հայցերը:
Հարուցվել է քրեական գործ, որով հետազոտվել են մի քանի հանցագործություններ, այդ թվում վերոհիշյալ դեպքը, որի վերաբերյալ քննիչ Դ. Վ. Շահբազյանի կողմից կայացվել է որոշում՝ քրեական գործի վարույթը կարճելու եւ քրեական հետապնդում չիրականացնելու մասին՝ հանցակազմի բացակայության հիմքով: Այս քրեական գործի շրջանակներում քննարկվել են նաեւ 2 այլ խախտումների դեպքեր՝ «Սեւանի պոլիկլինիկա» ՊՓԲԸ-ի տնօրեն Հասմիկ Ղազարյանի եւ նույն հաստատության գլխավոր հաշվապահ Զ. Ալավերդյանի կողմից իրականացված:
Այսպես, 2011 թ. հունիսի 23-ին Հասմիկ Ղազարյանը «Վարչական իրավախախտումների վերաբերյալ» ՀՀ օրենսգրքի 169.8 հոդվածով ենթարվել է վարչական տույժի 161.100 ՀՀ դրամի չափով: 2012 թ. դեկտեմբերի 26-ին «Վարչական իրավախախտումների վերաբերյալ» ՀՀ օրենսգրքի 236-րդ հոդվածով Հասմիկ Ղազարյանը ենթարկվել է 60000 ՀՀ դրամի չափով վարչական տուգանքի: Թե՛ առաջին, ու թե՛ երկրորդ դեպքերում Հասմիկ Ղազարյանը, օգտագործելով իր պաշտոնեական դիրքը, հանձնարարել է կազմակերպության գլխավոր հաշվապահին վերոհիշյալ տուգանքները վճարել «Սեւանի պոլիկլինիկա» ՊՓԲԸ-ի միջոցներից, այն է՝ պետական սեփականություն հանդիսացող գումարից: Այս պատմության ամենաուշագրավ մասը՝ վերոնշյալ մասով նույնպես քրեական գործը կարճվել է հաշվապահի դեպքում համաներման կիրառմամբ, իսկ տնօրենի դեպքում՝ իրադրության փոփոխման հիմքով: Թե ինչպես է իրադրությունը փոխվել եւ ինչ պատճառներով է Սեւանի քննչական բաժանմունքի քննիչ Դ. Շահբազյանը կայացրել այսպիսի որոշում, մնում է անհասկանալի: Դատական պրակտիկայում դժվար կլինի գտնել այսպիսի գործ, երբ նման իրավիճակում քրեական գործը կարճվի նախաքննության փուլում, առանց դատական կարգով քրեական գործի լուծման: Տվյալ դեպքում ակնհայտ է քննիչի եւ քրեական գործով մեղադրվող տնօրենի միջեւ համաձայնության առկայությունը:
