նախընտրելի դարձնելՀՀ ՊՆ վարչական համալիրում` պաշտպանական գերատեսչության ղեկավար Սեյրան Օհանյանի նախագահությամբ, այսօր՝ հոկտեմբերի 17-ին, տեղի ունեցավ Հանրապետական զորակոչային հանձնաժողովի ընդլայնված նիստը, որի ընթացքում ամփոփվեցին 2014 թվականի ամառային զորակոչի արդյունքները եւ քննարկվեցին ձմեռային զորակոչի պլանավորման աշխատանքները: Նիստին մասնակցում էին շահագրգիռ ՀՀ գերատեսչությունների ղեկավարները, մարզպետները, ՊՆ, ԶՈՒ, ԶՈՒ ԳՇ ղեկավար կազմը, բժշկական հանձնաժողովների ներկայացուցիչներ եւ այլք:
Ողջունելով նիստի մասնակիցներին` պաշտպանության նախարար Սեյրան Օհանյանը կարեւորեց միջոցառման անհրաժեշտությունը, նշելով, որ զինված ուժերի համար կարեւորագույն գործընթացներից մեկը զորակոչի շրջանակում նրա համալրումն է: Պաշտպանական գերատեսչության ղեկավարը փաստեց, որ վերջին տարիներին զորակոչին մասնակցող բոլոր կառույցների համատեղ ջանքերի շնորհիվ առավել բարձր հիմքերի վրա է դրվել զորակոչի գործընթացի իրականացումը:
Նիստի ընթացքում հիմնական հաշվետու զեկույցով հանդես եկավ ՀՀ ԶՈՒ ԳՇ պետ, գեներալ-գնդապետ Յուրի Խաչատուրովը: Խոսելով նախորդ զորակոչի արդյունքների եւ առաջիկա զորակոչի խնդիրների մասին, գեներալ-գնդապետը ներկայացրեց թե դրական միտումները եւ թե արձանագրված որոշակի բացթողումները: Անդրադարձ եղավ զորակոչվածների թվաքանակին, ծառայությանը ոչ պիտանի ճանաչվածների վիճակագրական տվյալներին, զինկոմիսարիատների եւ բուժհանձնաժողովների կողմից կատարված աշխատանքներին:
Նիստի ժամանակ քննարկվեցին նախորդ զորակոչի ընթացքում տեղ գտած իրավախախտումների, երիտասարդների կցագրմանը եւ հաշվառմանը, բուժհետազոտությանը, հիվանդության պատճառով բանակից զորացրվածների, զորակոչից խուսափողների նկատմամբ պատժամիջոցների ու վարչական տույժերի կիրառմանը, ինչպես նաեւ գործընթացին առնչվող այլ հարցեր:
Ամառային զորակոչն արդյունավետ կազմակերպելու գործընթացում ակտիվ մասնակցություն ցուցաբերած մի շարք պատասխանատուներ եւ զինծառայողներ պաշտպանության նախարարի կողմից պարգեւատրվեցին գերատեսչական մեդալներով, պատվոգրերով եւ արժեքավոր նվերներով:
Ամփոփելով խորհրդակցության աշխատանքները եւ շնորհակալություն հայտնելով ներկաներին համատեղ աշխատանքի համար` ՀՀ պաշտպանության նախարարը հույս հայտնեց, որ զորակոչի համար պատասխանատու բոլոր օղակների սերտ համագործակցության արդյունքում հերթական զորակոչի աշխատանքները եւս կիրականացվեն բարձր մակարդակով, այն կանցնի կազմակերպված ու առանց խոչընդոտների:
Հնարավոր կոռուպցիոն ռիսկերի ուղղությամբ իրականացվող հետեւողական պայքարի, զորակոչային բուժհետազոտությունների նկատմամբ խիստ վերահսկողություն սահմանելու եւ ընդհանուր առմամբ ձմեռային զորակոչը հստակ կազմակերպելու եւ անցկացնելու առումով պաշտպանական գերատեսչության ղեկավարի կողմից տրվեցին նաեւ որոշ ցուցումներ եւ հանձնարարականներ:
