Վարչապետ Հովիկ Աբրահամյանն ընդունել է ՄԱԿ-ի Մանկական հիմնադրամի (UNICEF) տարածաշրջանային տնօրեն Մարի Պիեր Պուարյեին: Տիկին Պուարյեն գտնվում է Հայաստանում՝ Երեւանում կազմակերպված Կենտրոնական եւ Արեւելյան Եվրոպայում ու ԱՊՀ-ում ՄԱԿ-ի մանկական հիմնադրամի համակարգողների տարեկան հավաքին մասնակցելու նպատակով:

Վարչապետը բարձր է գնահատել ՄԱԿ-ի Մանկական հիմնադրամի դերը` մեր երկրում երեխաների իրավունքների պաշտպանության, նրանց առողջության ու կյանքի պայմանների բարելավման գործում: Արդյունավետ համարելով կառույցի գործունեությունը՝ կառավարության ղեկավարը պատրաստակամություն է հայտնել այսուհետ եւս շարունակել աջակցել հիմնադրամի յուրաքանչյուր նախաձեռնության: Հովիկ Աբրահամյանը կարեւորել է UNICEF-ի կողմից Հայաստանում իրականացվող բազմաթիվ ծրագրերը եւ հավաստիացրել, որ հետեւողական է լինելու ձեռք բերված պայմանավորվածությունների իրականացման հարցում:

Մարի Պիեր Պուարյեն ողջունել է ՀՀ կառավարության բարեփոխումները երեխաների պաշտպանության ոլորտում եւ վերահաստատել ՄԱԿ-ի Մանկական հիմնադրամի՝ ՀՀ կառավարությանն այդ գործում օժանդակելու պատրաստակամությունը: Այս համատեքստում UNICEF-ի տարածաշրջանային տնօրենը բարձր է գնահատել սոցիալական ինտեգրված ծառայությունների համակարգի ներդրումը Հայաստանում, որի հաջողված փորձն ուսանելի օրինակ կարող է ծառայել նաեւ տարածաշրջանի մյուս երկրների համար:

Տիկին Պուարյեն շնորհակալություն է հայտնել UNICEF-ի տարեկան հավաքը Երեւանում պատշաճ մակարդակով կազմակերպելու համար, որի շրջանակում քննարկվել է նաեւ Հայաստանի հետ առաջիկա հինգ տարվա համագործակցության ծրագիրը: «Մեր գործընկերության ամենակարեւոր առանձնահատկությունն այն է, որ ուշադրության կենտրոնում երեխան է՝ համակողմանի խնդիրներով, ոչ թե ոլորտային մոտեցումը», - նշել է UNICEF-ի տարածաշրջանային տնօրենը եւ գոհունակություն հայտնել պատկան նախարարությունների, առաջին հերթին, ՀՀ աշխատանքի եւ սոցիալական հարցերի նախարարության հետ համագործակցության ընթացքից:

Երկուստեք ընդգծվել է, որ Հայաստան-UNICEF համագործակցության նոր ծրագրի հիմքում պետք է լինի ՀՀ-ում երեխաների իրավիճակի հետ կապված մարտահրավերների հաղթահարումը՝ աջակցություն երեխաների առավել խոցելի խմբերին, մանկատների բեռնաթափում եւ այլն: