նախընտրելի դարձնել«Մեծ քսանյակի» երկրները Տորոնտոյում G20-ի գագաթնաժողովի ամփոփիչ կոմյունիկե են ընդունել: Գագաթնաժողովը տեղի է ունեցել հունիսի 26-27-ը, Կանադայի մայրաքաղաքում:
Գագաթնաժողովի հիմնական թեմաներն են եղել համաշխարհային տնտեսական ճգնաժամի դեմ պայքարն ու ֆինանսական կարգավորումը: G20-ի անդամ երկրները պայմանավորվել են մինչեւ 2013 թվականը կրկնակի անգամ կրճատել իրենց երկրների բյուջեների դեֆիցիտը, իսկ 2016-ին հասնել պետական պարտք/ՀՆԱ հարաբերակցության կայուն նվազման: G20-ի առաջնորդները խոստացել են վավերացնել պայմանավորվածությունները Արժույթի միջազգային հիմնադրամում (ԱՄՀ) քվոտաներին եւ ձայներին առնչվող բարեփոխումների վերաբերյալ: Ինչպես նաեւ հավանություն են տվել նմանատիպ բարեփոխումներին Համաշխարհային բանկում:
«Մենք հավանություն ենք տվել մի շարք կարեւոր բարեփոխումների, որոնք համաձայնեցված են ՀԲ-ի բաժնետերերի հետ, որոնց արդյունքում 4,59 տոկոսով կմեծանա զարգացող եւ անցումային երկրների ձայների քանակը: Մենք ընդգծում ենք մեր վճռականությունը ապահովել 2008-ի ԱՄՀ-ում քվոտաներին եւ ձայներին առնչվող բարեփոխումների վավերացումը եւ Պարտավորությունների մասին նոր համաձայնագրի ընդլայնումը»,- ասված է G20-ի կոմյունիկեում:
Միաժամանակ G20-ի երկրներին չի հաջողվել համաձայնվել ֆինանսական հատվածում միասնական հարկ կիրառելու շուրջ: Կոմյունիկեում նշվում է, որ երկրներից յուրաքանչյուրը ինքնուրույն կարող է որոշել նման հարկատեսակ կիրառելու խնդիրը:
Ընդհանուր առմամբ, G20-ի ղեկավարները ամփոփիչ կոմյունիկեում նշել են, որ 2008-ից սկսած համաշխարհային տնտեսական ճգնաժամի դեմ պայքարի ջանքերը տվել են իրենց արդյունքները: Սակայն, նշվել է նաեւ, որ թեեւ համաշխարհային տնտեսության աճի նշաններ կան, սակայն մի շարք երկրներում պահպանվում է գործազրկության անթույլատրելի բարձր մակարդակ, եւ ճգնաժամի սոցիալական հետեւանքները նկատելի են:
Նշենք, որ Ռուսաստանն առաջարկել է 2013-ին G20-ի գագաթնաժողովն անցկացնել իր մոտ: Բացի Ռուսաստանից, նման հավակնություններ ունի նաեւ Թուրքիան: Նկատենք, որ G20-ի որեւէ հանդիպում Ռուսաստանի տարածքում տեղի չի ունեցել:
