«ԻՆԳՈ Արմենիա» ապահովագրական ընկերությունն այսուհետեւ կհետեւի Հայաստանի պետական տնտեսագիտական համալսարանի ուսանողների կրթության ամբողջ գործընթացին,  որից հետո ուսանողները փորձաշրջան կանցնեն ընկերությունում, նրանցից լավագույններն էլ աշխատանք կստանան: Համալսարանի եւ ընկերության միջեւ համագործակցության հուշագիրը ստորագրվեց այսօր` նոյեմբերի 13-ին:

ՀՊՏՀ ռեկտոր Կորյուն Աթոյանի խոսքով`հուշագրի միջոցով համալսարանի եւ «ԻՆԳՈ Արմենիա»-ի միջեւ արդեն իսկ եղած համագործակցությունն այլ հարթություն է տեղափոխվում:

«Սա միայն հետագայում աշխատանքի տեղավորման համաձայնագիր չէ, սա հնարավորություն է տալիս, որ «ԻՆԳՈ Արմենիա» ընկերությունը հետեւի կրթության ամբողջ պրոցեսին, մասնակցի կրթական ծրագրերի կազմմանը, արտադրական պրակտիկայի կազմակերպմանը, թեզերի կատարման ընթացքում հետեւի, որ ճիշտ թեմաներ ընտրվեն եւ վերջում լավագույն ուսանողներին կտեղավորի իր մոտ աշխատանքի»,-լրագրողներին ասաց ռեկտորը` նշելով, որ այսպիսով հաշվի է առնվում նաեւ գործատուի կարծիքը, ինչը կարեւոր է կրթության որակի բարելավվման համար:

«ԻՆԳՈ Արմենիա» ընկերության գործադիր տնօրեն Լեւոն Ալթունյանի խոսքով` ընկերությունը ջանք չի խնայի, որ ուսանողները որակյալ կրթություն ստանան եւ որակյալ մասնագետներ դառնան:

«Լավ հասկանալով, որ մենք ոչ այլընտրանքային հայրենիք ունենք, ոչ այլընտրանքային մայր  բուհ, մենք չենք տեսնում այլ ճանապարհ, բացի բուհին օգնություն տրամադրելուց: Բոլոր ջանքերը կներդնենք, որ ուսանողները որակյալ ուսում ստանան, որակյալ մանսագետներ ստացվեն ի փառս Հայաստանի եւ մեր ընկերության»,-լրագրողներին ասաց  Լեւոն Ալթունյանը: