նախընտրելի դարձնելAir Asia-ի կործանված օդանավի ինքնագրիչներում լսվում են վերհանող ուժի կտրուկ անկման մասին ազդանշանները:
Ինդոնեզական օդանավի օդաչուները փորձել են օդանավը դուրս բերել այդ վիճակից, սակայն առայժմ դժվար է հասկանալ նրանց խոսքերը, մեջբերում է Today-ը՝ քննության ներկայացուցչի խոսքերը:
Ինդոնեզիայի տրանսպորտի նախարար Իգնասիուս Ջոնանը նախկինում հայտնել էր, որ ռադարներից ստացված տվյալները վկայում են, որ «օդանավը հանկարծակի սկսել է վեր բարձրանալ, սակայն արագությունը նախատեսվածից բավական ցածր է եղել»: Դրանից հետո օդանավը կարող էր ընկնել, ենթադրել է նախարարը, փոխանցում է ՏԱՍՍ-ը:
Օդանավի ընկնելու վերաբերյալ նախնական զեկույցը պետք է հրապարակվի հունվարի 28-ին:
2014 թ. դեկտեմբերի 28-ին Air Asia ընկերության А320-200 օդանավը Ինդոնեզիայի Սուրաբայա քաղաքից դեպի Սինգապուր թռիչքից մոտ 40 րոպե անց անհետացել էր ռադարների էկրաններից՝ գտնվելով Կալիմանտան կղզու հատվածում: Օդանավում եղել էր 162 մարդ:
