Փետրվարի 5-ին, ժամը 10.05-ին, ոստիկանության Երեւան քաղաքի վարչության օպերատիվ կառավարման կետրոն է զանգահարել 1990 թ. ծնված Հայկ Մ.-ն եւ հայտնել, որ իրենց շենքի բակում կայանված իր եւ իր ավտոմեքենայի կողքին կայանված ավտոմեքենաները թալանել են:

Ոստիկանության լրատվության վարչությունից հայտնում են, թե պարզվել է, որ գիշերը Հայկ Մ.-ի «ՎԱԶ-21063» մակնիշի ավտոմեքենայի փոքր պատուհանը բացելով՝ սրահից գողացել «Սոնի» ձայնարկիչ, 2 նվագարկիչ, 1.000 դրամ, օծանելիք եւ փոխանցման տուփի մոտ տեղադրված պլաստմասե պաշտպանիչ` պատճառելով 50.000 դրամի նյութական վնաս:

Մեկնած օպերատիվ խումբը պարզել էր, որ նույն բակում կայանված, 1983 թ. ծնված Սասուն Ա.-ին պատկանող «ՎԱԶ-2101» մակնիշի ավտոմեքենայից գողացել են 1.000 դրամ, օծանելիք եւ դանակ, որից հետո բացելով շարժիչի ծածկոցը եւ տեսնելով, որ մարտկոցը բացակայում է` հեռացել են:

Ձեռնարկված միջոցառումների շնորհիվ, նույն օրը, ժամը 17.50-ին, բաժին բերման է ենթարկվել 1989 թ. ծնված Վազգեն Գ.-ն եւ տվել խոստովանական բացատրություն:

Գողոնը հայտնաբերվել եւ վերցվել է ապրանքագիտական փորձաքննության ներկայացնելու համար:

Կատարվում է հետաքննություն: