ՎիվաՍել-ՄՏՍ-ի գլխամասային գրասենյակում հյուրընկալվել են արտերկրից ժամանած 20-ից 32 տարեկան հայ կամավորներ, ովքեր պատրաստակամ են իրենց մասնագիտական հմտությունները Հայաստանի մարզերում կիրառելու հարցում եւ երկրում աշխատելու են մոտ 6 ամիս:

ՎիվաՍել-ՄՏՍ-ի գլխավոր տնօրեն Ռալֆ Յիրիկյանը կամավորներին ծանոթացրել է ընկերության գործունեության հիմնական գործառույթներին, հիմնարար արժեքներին, ինչպես նաեւ որդեգրած` կորպորատիվ սոցիալական պատասխանատվության քաղաքականությանը: Ռալֆ Յիրիկյանը ներկայացրել է նաեւ ընկերության ձեռնարկած քայլերը՝ Հայոց ցեղասպանության վերաբերյալ նոր փաստերի հավաքագրման,  հասարակության իրազեկվածության բարձրացման եւ ցեղասպանության դատապարտման ուղղությամբ: Մասնավորապես, ընկերությունը միացել է Հայոց ցեղասպանության թանգարան-ինստիտուտի նախաձեռնություններին՝ աջակցություն ցուցաբերելով եղեռնի ականատեսների կարեւոր մենագրությունների հրատարակման, ինչպես նաեւ՝ Հայաստանում եւ երկրի սահմաններից դուրս պահպանված հավաքածուներից արժեքավոր գրքերի ձեռք բերման հարցում: Ընկերության աշխատակիցները կամավոր մասնակցել են  Ցեղասպանության թանգարան-ինստիտուտի տարածքում կազմակերպված մաքրման աշխատանքներին եւ ծառատունկին:

ՎիվաՍել-ՄՏՍ-ը ողջունում է սփյուռքահայ երիտասարդներին հայրենիք հրավիրող ծրագրերը, որոնց նպատակը կամավորական աշխատանքներում առավել մեծ թվով երիտասարդների ներգրավելն ու երկրի մշակույթին ծանոթացնել է: Կարեւորվում է այն մոտեցումը, որ Հայաստանը լավագույնս ճանաչելու համար, պետք է երկիրը դիտել ոչ միայն մշակութային եւ պատմական բազմաթիվ հուշարձանների ծանոթացող զբոսաշրջիկի, այլեւ երկրի տիրոջ աչքերով: Եվ որ անհրաժե’տ է  հայրենիք այցելել ավելի կարեւոր նպատակով, ծավալել մասնագիտական գործունեություն կամ կամավորագրվել սոցիալական տարբեր ծրագրերի իրականացմանը եւ այդ կերպ`սեփական ավանդն ունենալ երկրի զարգացման հարցում: Բացահայտել Հայաստանը՝ նշանակում է լինել հասարակության մի մասնիկը, զգալ երկրի զարկերակը, անմիջական շփման միջոցով ծանոթանալ այստեղ բնակվող հայրենակիցներին, ճանաչել նրանց ապրելակերպն ու առօրյան: Կարեւոր է նաեւ լավ հարաբերություններ հաստատել հասակակիցների հետ եւ ստեղծել անձնական ու գործնական ամուր կապեր:

«Սեփական արմատները ճանաչելու ցանկությունը ձեր կյանքի լավագույն որոշումներից է: Գտնվելով ձեր նախահայրերի, նախապապերի հողում՝ դուք կբացահայտեք ձեր ինքնությունը»,- ասել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը՝ ԱՄՆ-ից, ՌԴ-ից, Սիրիայից, Մեքսիկայից, Լիբանանից եւ Կանադայից ժամանած հայ երիտասարդներին: «Կցանկանայի մեջբերել մեր մեծանուն հայրենակցի` Վիլյամ Սարոյանի խոսքերը` «Քո կյանքի ժամանակը» պիեսից. «Ամեն մարդ քո նմանակն է...»,-գրում է Վարպետը: Եվ ես կցանկանայի, որ Հայաստանում գտնվելու ընթացքում սա լինի ձեր նշանաբանը՝ «Ամեն հայի մեջ իմ եսն է»: Ըստ իս, այսպես է պետք հաղթահարել Հայաստանում ապրող հայերի եւ սփյուռքահայերի մտածելակերպում առկա բնական տարբերությունները եւ կարծրատիպային պատկերացումները: Ինքս էլ անցել եմ անորոշությամբ, մտահոգություններով, ոգեւորությամբ, բացահայտումներով, երբեմն` նաեւ հուսահատությամբ լի այդ ճանապարհը եւ, ի վերջո, ընդունել եմ արյանս կանչը: Պարզապես պետք է հիշել, որ ոչ մի երկիր զերծ չէ խնդիրներից: Մենք կարող ենք հաջողել, եթե առաջնորդվենք լավատեսությամբ եւ մեր երկրի հանդեպ անձնական պատասխանատվության զգացումով»,-ավելացրել է Ռալֆ Յիրիկյանը:

«Դեպի Հայք» հիմնադրամը 2004 թվականից ՎիվաՍել-ՄՏՍ-ի աջակցությամբ կազմակերպել է 35 երկրից Հայաստան ժամանած հայ կամավորների աշխատանքը` Հայաստանի տարբեր մարզերում: Հայաստանում հաջողելու Ռալֆ Յիրիկյանի օրինակն այն գործոններից մեկն է, որը հետաքրքրություն են առաջացրել սփյուռքահայ երիտասարդների մոտ` Հայաստան գալու եւ տարբեր նախագծերի մասնակցելու հարցում:

Ռալֆ Յիրիկյանի հետ հանդիպումն անցել է հարցուպատասխանի ձեւաչափով՝ ընդգրկելով տարբեր թեմաների առնչվող հարցեր: Կամավորները կիսվել են Հայաստանում ստացած իրենց տպավորություններով: Կազմակերպված քննարկումը երիտասարդներին օգնել է առավել սպառիչ պատկերացում կազմել բիզնեսի կառավարման եւ ղեկավարման սկզբունքերի մասին: