Անբարոյականությունը հայրենի  քաղաքը  տարիներ  շարունակ  թալանելն է: Այդ մասին NEWS.am-ի թղթակցի հետ զրույցում ասաց Գյումրիի քաղաքապետ Սամվել Բալասանյանը՝ արձագանքելով նախկին քաղաքապետ Վարդան Ղուկասյանին:  Վերջինս Բալասանյանի՝ ԲՀԿ-ն լքելու քայլն անբարոյականություն էր անվանել:

«Չէի ուզենա անդրադառնալ այդ հոգեկան հիվանդին, հատկապես որ գարնանը նրա մոտ սրացումներ են նկատվում, բայց այս անգամ պետք է ասեմ: Անբարոյականություն է հայրենի  քաղաքը  տարիներ  շարունակ  թալանելը, եկեղեցու  կառուցման  անվան  տակ  փող  հավաքելն  ու  այդ  գումարներով  անձնական  պալատներ  կառուցելը, իր խնամքին  մնացած  երեխաներին  մարդասպան  դարձնելն  ու խեղելը»,- նշել է Բալասանյանը՝ ակնկարկելով Վարդան Ղուկասյանին:

Խոսելով ԲՀԿ-ն լքելու իր քայլի մասին՝ Սամվել Բալասանյանն ասաց. «Ես ԲՀԿ-ից դուրս եմ եկել այն բանից հետո, երբ կուսակցությունը լքեց ԲՀԿ հիմնադիր Գագիկ Ծառուկյանը, որի շուրջն էր ստեղծվել ԲՀԿ-ն»:

Գյումրիի քաղաքապետը նաեւ արձանագրեց, որ ԲՀԿ-ին իր անդամակցությունը մշտապես ծառայեցրել է Գյումրիի համար տարատեսակ ծրագրեր իրականացնելու, քաղաքին օգտակար լինելու համար եւ հիմա էլ շարունակելու է օգտակար լինել քաղաքին: