Լրագրողները չպետք է ստիպված լինեն ինքնագրաքննություն կատարել իրենց կյանքի համար վախենալու պատճառով: Այս մասին ասված է ՄԱԿ-ի գլխավոր քարտուղար Բան Կի-Մունի ուղերձում՝ նվիրված Լրագրողների դեմ հանցագործությունների անպատժելիության վերացման միջազգային օրվան:

Ուղերձում, մասնավորապես, ասվում է.

«Այսօր մենք հիշում ենք այն լրագրողներին ու լրատվության ոլորտի աշխատակիցներին, որոնք սպանվել են իրենց պարտականությունները կատարելիս:

Վերջին տասնամյակում ավելի քան 700 լրագրող է սպանվել (ամեն հինգ օրում՝ մեկը) պարզապես հանրությանը լուրեր ու տեղեկություններ հաղորդելու համար:

Շատերը զոհվում են այն հակամարտությունների ժամանակ, որոնք լուսաբանում են այնքան աներկյուղ: Սակայն չափազանց շատերն էլ գիտակցաբար լռեցվել են ճշմարտությունը հաղորդելու ձգտման համար: Նման դեպքերի միայն 7 տոկոսն է լուծում ստանում, եւ 10 հանցագործությունից միայն մեկն է լիակատար հետաքննվում:

Նման անպատժելիությունը խորացնում է վախը լրագրողների շրջանում եւ կառավարություններին հնարավորություն է տալիս հաջողությամբ գրաքննություն իրականացնել:

Մենք պետք է ավելին անենք՝ պայքարելու այս երեւույթի դեմ ու ապահովելու, որ լրագրողները կարողանան ազատորեն լուսաբանել խնդիրները: Լրագրողները չպետք է ստիպված լինեն ինքնագրաքննություն կատարել իրենց կյանքի համար վախենալու պատճառով:

Լրագրողների դեմ հանցագործությունների անպատժելիության վերացման միջազգային օրը ՄԱԿ-ի Ընդհանուր վեհաժողովի կողմից հռչակվել է, որպեսզի ընդգծվի լրագրողներին պաշտպանելու հրամայականը, ինչպես նաեւ ի հիշատակ 2013 թ. նոյեմբերի 2-ին Մալիում սպանված ֆրանսիացի երկու լրագրողների:

Ես ողջունում եմ ՅՈՒՆԵՍԿՕ-ին՝ Լրագրողների անվտանգության եւ անպատժելիության հարցի վերաբերյալ ՄԱԿ-ի գործողությունների ծրագիրը նախաձեռնելու համար: Այդ ծրագիրը ՄԱԿ-ի գործակալությունների, կառավարությունների, քաղաքացիական հասարակության, կրթական հաստատությունների ու լրատվամիջոցների ջանքերը միավորող հզոր մեխանիզմ է:

Միասին մենք պետք է կոտրենք անպատժելիության շղթան ու պաշտպանենք լրագրողների` ցանկացած պարագայում ճշմարտության հաղթանակին նպաստելու իրավունքը: