նախընտրելի դարձնելՎենեսուելայի Գերագույն դատարանը խորհրդարանի բոլոր որոշումները ուժը կորցրած է համարել այնքան ժամանակ, քանի դեռ ընդդիմադիր կուսակցության պատգամավորներից երեքը չեն հեռացվել աշխատանքից, տեղեկացնում է Associated Press-ը: Գործակալության կարծիքով, դա երկիրը մոտեցնում է իշխանության համար բացահայտ պայքարի:
Դատարանի այդ որոշումը վրդովեցրել է ընդդիմադիր կոալիցիայից խորհրդարանի անդամներին, նրանք դա կոչել են ընտրություններում իրենց պատմական հաղթանակը խարխլելու փորձ: Գերագույն դատարանի գործողությունները գնահատել են որպես «Ժողովրդավարական միասնության կլոր սեղանին» պարզ մեծամասնությունից զրկելու փորձ:
Հունվարի 11-ի իր որոշման մեջ դատարանը ուժը կորցրած է համարել «բոլոր օրինագծերը, որոնք ընդունվել են կամ կընդունվեն», դրանով ազգային ժողովին զրկելով լիազորություններից: Ընդդիմադիրներն այդ որոշումն ընկալել են որպես պետական հեղաշրջման փորձ եւ հայտարարել են, որ շարունակելու են անտեսել դատարանին, տեղեկացնում է Lenta-ն:
Դիոսդադո Կաբելյոն, որը մինչեւ անցյալ շաբաթ ղեկավարում էր խորհրդարանը եւ մինչ այժմ համարվում է նախագահ Նիկոլաս Մադուրոյից հետո երկրում ամենաազդեցիկ քաղաքական գործիչներից մեկը, հայտնել է, որ դատարանի որոշումն օրինական է եւ որ ընդդիմադիր առաջնորդները պիտի անմիջապես հեռացնեն այդ պատգամավորներին:
Այսօրվա դրությամբ խորհրդարանի նոր կազմը ոչ մի օրինագիծ չի ընդունել, բայց բանավեճ է սկսել ընդդիմության ձերբակալված առաջնորդների համաներման հարցի շուրջ, որոնք իրավապաշտպան խմբերի կողմից քաղբանտարկյալ են ճանաչվել: Բացի այդ, կոմիտե է ձեւավորվել, որը կոչված է հետաքննել դեկտեմբերի ընտրություններին սոցիալիստական կուսակցության պարտությունից անմիջապես հետո Գերագույն դատարանի 13 դատավորի հապշտապ նշանակումը: Այդ նշանակումների փաստն իսկ ժողովրդավարական բլոկի ներկայացուցիչները գնահատում են որպես դատարանի կաշառվածության ապացույց:
Վենեսուելայում խորհրդարանական ընտրությունները տեղի են ունեցել 2015-ի դեկտեմբերի 6-ին: 17 տարվա ընթացքում առաջին անգամ սոցիալիստական կուսակցությունը, որը ղեկավարում է նախագահ Նիկոլաս Մադուրոն, պարտություն է կրել:
