նախընտրելի դարձնել
ՀԱՀ-ի նախագահ Ջեյքոբ Զուման կարգադրել է ապրիլի 1-ին Սուդանի Դարֆուրի շրջանից հանել հարավաֆրիկյան զորքը, տեղեկացնում է ՏԱՍՍ-ը:
«Հարավ-աֆրիկյան պաշտպանության ազգային ուժերը Դարֆուր էին ուղարկվել 2008-ին` Դարֆուրում ՄԱԿ-ի եւ Աֆրիկյան միության համատեղ գործողության (UNAUMID) շրջանակում:
Զորքի դուրս բերումը նախատեսված է 2016-ի ապրիլի 1-ին», - ասված է նախագահական վարչակազմի տարածած հաղորդագրության մեջ: Զուման զինվորականներին շնորհակալություն է հայտնել Դարֆուրում խաղաղության վերականգնմանն ուղղված գործողությանը մասնակցության համար:
ՀԱՀ-ի սահմաններից դուրս ներկայումս ընդհանուր թվով ավելի քան 4600 հարավաֆրիկացի խաղաղարար է ծառայում` Սուդանում եւ Կոնգոյի Ժողովրդավարական Հանրապետությունում:
UNAUMID-ի առաքելությունը Դարֆուրում տեղակայվել էր յոթ տարի առաջ, երբ փորձ էր արվել վերջ դնել կառավարական զորքի եւ տեղացի ապստամբների միջեւ 2003-ին բռնկված զինված բախմանը: Ներկայումս UNAUMID-ը խոշորագույն խաղաղարար առաքելություններից է, որին ավելի քան 25 հազար զինծառայող եւ ոստիկան է մասնակցում:
