«Իսլամական պետություն» կազմակերպության գրոհայինները ցանցում տեսահոլովակ են տեղադրել, որում նրանք սպառնում են  Facebook սոցցանցի հիմնադիր Մարկ Ցուկերբերգին եւ Twitter-ի ստեղծող Ջեք Դորսիին, տեղեկացնում է ամերիկյան համացանցային  Vocativ պարբերականը:

Տեսանյութը 25 րոպե է տեւում: Դրանում ցույց է տրվում, թե ինչպես են ջարդվում երկու սոցցանցի օգտատերերի էջերը, ինչպես նաեւ երեւում են Ցուկերբերգի եւ Դորսիի պատկերները` հրազենի գնդակների հետքերով: 

Ահաբեկիչները հայտնում են, որ իրենք արդեն ավելի քան  10 հազար անհատական եւ ավելի քան 150 խմբային հաշիվ են ջարդել Facebook-ում, ինչպես նաեւ  Twitter-ի մոտ հինգ հազար հաշիվ:

Սպառնալիքներով տեսահոլովակը կարող է իսլամիստների պատասխանը լինել ժողովրդականություն վայելող սոցցանցեր նրանց մուտքի նպատակասլաց սահմանափակմանը, տեղեկացնում է «ՄԻՌ-24»-ը:

«Ամեն օր դուք հայտնում եք մեր հաշիվները վերացնելու մասին: Դա՞ է այն ամենը, ինչի ընդունակ եք» - ասված է հաղորդագրության տեքստում, որը վերնագրված է  «Կողմնակիցների կրակ»: