Երեւանի քաղաքապետ Տարոն Մարգարյանը նոր բնակարանի բանալիներ է հանձնել ՀՀ ժողովրդական արտիստ, ՀՀ արվեստի վաստակավոր գործիչ, ռեժիսոր-վավերագրող, սցենարիստ, դերասան, ՀԽՍՀ եւ ՌԴ արվեստի վաստակավոր գործիչ Արտավազդ Փելեշյանին եւ թավջութակահար, Չայկովսկու անվան միջազգային մրցույթի ոսկե մեդալակիր, «Մովսես Խորենացի» մեդալակիր Նարեկ Հախնազարյանին:

Քաղաքապետարանից NEWS.am-ին հայտնում են, որ շնորհավորելով արվեստագետներին` քաղաքապետ Տարոն Մարգարյանը բարձր է գնահատել նրանց մասնագիտական գործունեությունը՝ առանձնակի կարեւորելով նաեւ մշակութասեր սերունդ կրթելու եւ դաստիարակելու առաքելությունը:

«Արդեն մի քանի տարի է` Հանրապետության նախագահի առաջարկով բարի ավանդույթ ենք դարձրել մեր ճանաչված ու վաստակաշատ արվեստագետներին նոր բնակարաններ նվիրելը: Սա յուրովի գնահատական է մեր բոլոր այն քաղաքացիներին, ովքեր իրենց տաղանդով եւ մասնագիտական հմտություններով ամբողջ աշխարհում բարձր են պահում մեր երկրի պատիվը: Ի սրտե շնորհավորելով մաղթում եմ, որ առողջ վայելեք ձեր նոր բնակարանները», - ընդգծել է Տարոն Մարգարյանը՝ արվեստագետներին մաղթելով նաեւ ստեղծագործական նորանոր հաջողություններ։

Արտավազդ Փելեշյանն ու Նարեկ Հախնազարյանն էլ իրենց հերթին շնորհակալություն են հայտնել իրենց վաստակը գնահատելու համար:

Նշենք, որ Արտավազդ Փելեշյանին ու Նարեկ Հախնազարյանին Երեւան համայնքի սեփականություն համարվող բնակարանները տրամադրելու որոշումները Երեւանի ավագանին կայացրել է մարտի 18-ին գումարած նիստում:

Արտավազդ Փելեշյանը բնակարան ստացավ Երեւանի կենտրոնում