նախընտրելի դարձնել
Գորիսի ոստիկանապետ Գեւորգ Ազիզյանի մասնակցությամբ տեղի ունեցած միջադեպի հետեւանքով տուժած եւ գործով որպես մեղադրյալ կալանավորված, այնուհետեւ գրավի դիմաց ազատ արձակված Արթուր Գեւորգյանի համար տարօրինակ է, որ այս միջադեպից հետո շրջանառվում է Սյունիքի մարզպետ Սուրիկ Խաչատրյանի անունը, նրա խոսքով, տեղի ունեցած միջադեպի հետ մարզպետը որեւիցե կապ չունի. «Սուրիկ Խաչատրյանն ընդհանրապես կապ չունի, ես էլ եմ զարմացած, որ նրա անունը շոշափվել է: Թե էդ մարդուն խի՞ խառնեցին էս գործի մեջ՝ չեմ հասկանում»,- այս մասին այսօր՝ մարտի 30-ին, NEWS.am-ի հետ զրույցում ասաց նա:
Արթուր Գեւորգյանի խոսքով, ինքը վիճաբանության ժամանակ չի իմացել, որ Գորիսի ոստիկանապետի հետ է վիճել. «Ես որ տեղյակ լինեի, որ ոստիկանապետն է՝այլ կերպ կմոտենայի: Ինձ մեքենայի մեջ ոստիկաններից մեկն ասաց՝ գիտես, որ ոստիկանապետի հետ գործ ունես»,- ասաց Արթուր Գեւորգյանը:
Նրա խոսքով, մարտի 8-ին ընկերներով Գորիսի ռեստորաններից մեկում են եղել, ուզեցել են ռեստորան մտնել, սակայն, իենց թույլ չեն տվել՝ ասելով, որ այն արդեն փակ է: Երբ պատրաստվել են դուրս գալ, տեսել են, որ ինչ-որ մեքենա են ներս թողել, այդ ժամանակ Արթուրի ընկերներից մեկը բարկացել է եւ հարցրել՝ ինչու են նրանց թույլ տալիս մտնել, իրենց՝ ոչ, որից էլ սկսվել է ծեծկռտուքը:
«Ընկերոջս քաշում, տանում էին, իջել եմ, որ ասեմ՝ ընկերոջս խի՞ եք տանում ու միանգամից վիճաբանություն է սկսվել: Ռեստորան էինք ուզում մտնել, ասացին փակ է, չթողեցին մտնել, հետո տեսանք, որ ինչ-որ մեքենայի թողեցին ներս, ընկերս իջավ, ասաց՝ գնամ տեսնեմ էդ ինչի իրենց թողեցին, մեզ չէ: Մեկ էլ տեսա, որ մեկը քաշքշում է , ընկերներով իջանք, գնացինք տեսնելու՝ ինչ ա եղել: Հետո ինձ ասացին՝ դու՞ ով ես, ի՞նչ կապ ունես ու հարձակվեցին իմ վրա ու սկսեցին ծեծել, հետո պարզվեց, որ ոստիկանապետն է»,-պատմում է Արթուրը:
Նրա խոսքով, ծեծկռտուքի արդյունքում ինքը մարմնական վնասվածքներ է ստացել՝ հարվածների հետեւանքով վնասվել է լեզուն. «Լեզուս էր վնասվել, թոքերիս շրջանում ցավեր ունեի, բայց արդեն լավ եմ զգում»:
Նշենք, որ Արթուր Գեւորգյանը դեպքից հետո կալանավորվել էր, սակայն 500 հազար դրամ գրավի դիմաց ազատ է արձակվել:
ՀՔԾ-ի տարածած հաղորդագրության համաձայն՝ մարտի 8-ին՝ ժամը 22:15-ի սահմանում, Գորիսում գտնվող «Դիանա» հյուրանոցային համալիրին հարող տարածքում տեղի ունեցած վիճաբանության դեպքի առթիվ ՀՀ քննչական կոմիտեի Սյունիքի մարզային քննչական վարչության Գորիսի բաժնում քաղաքացի Արթուր Գ.-ի նկատմամբ ՀՀ քրեական օրենսգրքի 316-րդ հոդվածի 1-ին մասով հարուցված քրեական գործը ՀՀ գլխավոր դատախազը օբյեկտիվ, լրիվ և բազմակողմանի քննություն կատարելու նպատակով ուղարկել է ՀՀ հատուկ քննչական ծառայություն:
