Գարնանային առավոտ է, եւ Իոսիֆ Ադամյանը սուրճ է խմում իր հյուրատան շքապատշգամբում: Այստեղ նա հյուրերի է ընդունում Անգլիայից, Ֆրանսիայից եւ Ռուսաստանից: Այստեղ իջեւանում են հյուրեր ամբողջ աշխարհից: Նրանց մեծ մասը հայերեն է խոսում: Այս մասին գրում է New York Times պարբերականը:

««Արմենիա» հյուրանոցում, որտեղ սովորաբար իջեւանում են սփյուռքի հայերը, ռեստորանում օսլայած սփռոցներ են եւ, իհարկե, հայկական կոնյակ:

Նախկին Խորհրդային միության հակամարտող տարածաշրջանի մայրաքաղաքի համար, որն առավելապես հայտնի է ցեխով եւ աղքատությամբ, Ստեփանակերտը զարմանալիորեն լավ տեսք ունի:

Ամենուր ամբողջ աշխարհի Սփյուռքի հոգատարության հետքերն են: Առջեւի բլրի վրա նոր հիվանդանոց է կառուցվում: Դեպի քաղաք տանող ճանապարհին հավասար ասֆալտ է:

Այս աջակցությունը, այդ թվում՝ Հարավային Քալիֆորնիայի խոշոր հայ համայնքից, զարմանալի մայրաքաղաքային կոլորիտ է հաղորդում փոքրիկ Ղարաբաղի մայրաքաղաքին:

Սփյուռքի աջակցությունն ամեն ինչ է փոխում: Փողեր է տրամադրել նաեւ Քալիֆորնիայից գործարար, հանգուցյալ Քըրք Քըրքորյանը: Շվեյցարահայն էլ կառուցել է Golden Fish խոշոր ձկնաբուծարանը: Քալիֆորնիան եւ ամերիկյան վեց այլ նահանգներ ճանաչել են այս հանրապետությունը, սակայն ԱՄՆ-ի դաշնային կառավարությունը, ինչպես նաեւ որեւէ այլ պետություն դա չեն արել:

Նախկին ԽՍՀՄ-ի սառեցված հակամարտություններում, որոնք առնվազն վեցն են, շատ բան Ռուսաստանի արտաքին քաղաքականության մաս է կազմում: Մոսկվայի համար Վրաստանում, Մոլդովայում, իսկ հիմա՝ նաեւ Ուկրաինայում հակամարտությունները ծառայում են տեղական անկախ կառավարությունները թուլացնելուն, ժողովրդավարությունը վարկաբեկելու եւ ՆԱՏՕ-ի ու ԵՄ-ի դիրքերի ամրապնդումը կանխելու համար:

Ռուսաստանը, կարծես, հակամարտության մեջ Հայաստանի կողմում է, չնայած Մոսկվան զենք է վաճառում երկու կողմերին էլ: Բռնկումը դադարեցրեց հրադադարը, որի շուրջ բանակցություններն անցկացրեց Մոսկվան:

14-ամյա Դավիթ Աղամալյանը հայացքով ուղեկցում է զինվորներին: Այստեղ յուրաքանչյուր տղա կարող է անմիջապես երկու բան նշել. քանի տարեկան է եւ որքան ժամանակում կարող է քանդել-հավաքել Կալաշնիկով ավտոմատը: Այստեղ դա սովորեցում են 13 տարեկանից: Դավիթի լավագույն ցուցանիշը 27 վայրկյանն է: Ամենեւին վատ չէ:

Աղջիկների առաջին օգնության դասընթացներին են մասնակցում: Ե՛վ աղջիկներին, ե՛ւ տղաներին սովորեցնում են շարք կանգնել»: