Ախալքալաքի շրջանի Վաչիան գյուղում տեղի ունեցած ողբերգական սպանության կապակցությամբ Վրաստանում ՀՀ դեսպան Յուրի Վարդանյանը հեռախոսազրույցներ է ունեցել Սամցխե-Ջավախքի նահանգապետ Ակակի Մաչուտաձեի եւ ոստիկանապես Թեյմուրազ Կալանդաձեի հետ:

ԱԳՆ-ից NEWS.am-ին հայտնում են, որ վրացական կողմն արձագանքել է, որ դեպքի առնչությամբ իրականացվում է հետաքննություն, կասկածյալը ձերբակալվել է:

ՀՀ դեսպանությունը մշտական կապի մեջ է Վրաստանի իրավապահ մարմինների հետ եւ ուշիուշով հետեւում է զարգացումներին:

NEWS.am-ի տեղեկություններով իրավապահներն այսօր` հուլիսի 11-ին,  ձերբակալել են նույն գյուղից 3 երիտասարդների: Նրանք Քաչոտյանների տուն են մտել գողություն կատարելու նպատակով. Իմացել են, որ ընտանիքի հայրը Ռուսաստանի Դաշնությւոնից գումար է ուղարկել: Ըստ նախնական տեղեկությունների, հանցագործները հուլիսի 10-ի երեկոյան լուսամուտից մտել են Քաչոտյանների տուն, տանտիրուհու դիմադրությանը հանդիպելով`  բութ գործիքով հարվածել են նրա գլխին, այնուհետեւ, սպանել նրան եւ ընտանիքի մյուս  անդամներին, այնուհետեւ հետքերը թաքցնելու համար հրդեհել տունը, որն ամբողջությամբ չի այրվել:

Սպանությունը կատարելու կասկածանքով ձերբակալվածների ինքնությունը դեռ չի հաղորդվում:

Ավելի վաղ NEWS.am-ը տեղեկացրել էր, որ Ջավախքի Ախալքալաքի շրջանի Վաչիան գյուղում Քաչոտյանների ընտանիքի 4 անդամներին` մորը եւ 7, 13, 18 տարեկան երեխաներին, հուլիսի 10-ին, հարեւանները հայտնաբերել են սպանված:

Նախնական տեղեկություններով,  հանցագործը մորն ու աղջիկներին սպանել է  բութ գործիքի հարվածներով, իսկ տղային խեղդամահ է արել:

Նշենք, որ Վաչիանը Ջավախքի Ախալքալաքի շրջանի հայաբնակ գյուղերից է, Վաչիանի կողքով է անցնում նորաբաց թուրք-վրացական միջպետական սահմանը:

Մահացածներին գտնելու պահին տան իրերը` սեղան ու աթոռները հատակին ընկած են եղել, իսկ տունը ծխից մրոտված:

Նշենք, որ ընտանիքի հայրը` Վաղինակ Քաչոտյանը,  Ռուսաստանի Դաշնությունում է` արտագնա աշխատանքի: