Եթե ուզում եք ազգին ծառայել, պետք է լավ կրթվել: Այս մասին, այսօր՝ սեպտեմբերի 16-ին, Խաչատուր Աբովյանի անվան հայկական պետական մանկավարժական համալսարանի տարբեր ֆակուլտետների առաջին կուրսերի ուսանողների երդման արարողության ժամանակ նշել է ԱԺ նախագահ, բուհի հոգաբարձուների խորհրդի նախագահ Գալուստ Սահակյանը:

ԱԺ-ից NEWS.am-ին հայտնում են, որ այս արարողությունը ավանդաբար տեղի է ունենում Խաչատուր Աբովյանի տուն-թանգարանում:

Շնորհավորելով առաջին կուրսեցիներին եւ բարձր գնահատելով նրանց ընտրած մասնագիտությունը՝ ՀՀ Ազգային ժողովի նախագահ Գալուստ Սահակյանը հատկանշական է համարել արարողությունը եւ հորդորել ուսանողներին հավատարիմ մնալ իրենց երդմանը:

«Եթե ուզում եք ազգին ծառայել, պետք է լավ կրթվել, քանի որ մեր պետությանը գրագետ երիտասարդություն է անհրաժեշտ: Մանկավարժական համալսարանն ամեն տարի փորձում է ավելի կատարելագործել կրթական ծրագրերը՝ ձեր առջեւ բացելով գիտության նոր ուղիներ»,- ասել է ԱԺ նախագահը:

Բուհի ռեկտոր Ռուբեն Միրզախանյանը եւս շնորհավորելով ուսանողներին՝ նշել է, որ ավարտելուց հետո նրանք՝ արդեն որպես մանկավարժ, կմտնեն դպրոց՝ իրենց գործունեության հիմքում ունենալով բանիմաց ու ժողովրդավար սերունդ կրթելը: