Նախընտրելի
Կառավարությունը հավանություն չի տվել «Նաիրիտ» գործարանի վերաբերյալ «ԲՀԿ» կուսակցության խորհրդարանական խմբակցության օրինագծին: Կառավարությունը բացասական եզրակացությունը հաստատել է սեպտեմբերի 29-ին:
Էներգետիկայի եւ բնական պաշարների նախարար Աշոտ Մանուկյանը հայտնել է, որ օրինագծի գաղափարը պարզ է. աջակցել երկրի արդյունաբերության համար կարեւոր ձեռնարկությանը: Այնուամենայնիվ, Արդարադատության նախարարության եզրակացության համաձայն, օրինագիծը Սահմանադրության հետ հակասության մեջ է մտնում: Այդ պատճառով առաջարկվում է այն դարձյալ քննարկել համապատասխան պետմարմինների հետ:
Օրինագծի հեղինակներն առաջարկում են խորհրդարանական հանձնաժողով ստեղծել, որը կուսումնասիրեր գործարանի գործունեությունը, իսկ հետո կվերահսկեր հնարավոր ներդրողների պարտավորությունների կատարումը: Հանձնաժողովի մեջ կներգրավվեն կառավարության, ինչպես նաեւ հենց ձեռնարկության ներկայացուցիչներ: Այդ կապակցությամբ եզրակացության մեջ նշվում է, որ պետական վերահսկողությունը գործադիր, որ թե օրենսդիր իշխանության գործն է: Օրինագծում եւս մեկ առաջարկ կա. գործարանը 5 տարով ազատել հարկերից, եթե 70 մլն դոլար եւ ավելին առաջարկող ներդրող հայտնվի: Դրա դեմ նախարարներն առարկություններ չեն ներկայացրել:
Հիշեցնենք, որ 2006 թվականին պետությունը «Նաիրիտ» գործարանի բաժնետոմսերի 90 տոկոսը վաճառել է բրիտանական «Rhinoville Property Limited» կոնսորցիումին` 40 մլն դոլարով: Այդ ժամանակվանից ընկերությունը գործնականում ոչ մի անգամ հանդես չի եկել հանրության կամ մամուլի առաջ: 2006 թվականին ԱՊՀ-ի Միջպետբանկը «Rhinoville» -ի համար 70 մլն դոլարի վարկային գիծ է բացել, որն ընկերությունը չի փակել: 2014 թվականի հունվարին Մոսկվայի Արբիտրաժային դատարանը բավարարել է բանկի հայցը գործարանի վերոհիշյալ բաժնետոմսերի 90 տոկոսը պարտքի դիմաց առգրավելու վերաբերյալ: Մնացած 10 տոկոսը պատկանում է Հայաստանի կառավարությանը: 2015 թվականի դեկտեմբերին բանկի հետ բանակցությունների արդյունքում կառավարությունը ստացել է նաեւ մնացած 90 տոկոսը: Համաշխարհային շուկաներում պահանջված քլորոպրենային կաուչուկ արտադրող ձեռնարկությունը կանգնած է 2010 թվականի ապրիլից:
