նախընտրելի դարձնելՍննդի անվտանգության պետական ծառայությունն ուսումասիրություն կանցկացնի մի շարք ընկերությունների կողմից արտադրված կաթնաշոռերի անվտանգությունը պարզելու նպատակով:
Այս առնչությամբ ՍԱՊԾ տարածած հաղորդագրության մեջ նշվում է.
«Հետք» էլեկտրոնային կայքում հրապարակվել է «Կաթնաշոռ՝ աղիքային ցուպիկով եւ խմորասնկերի, բորբոսասնկերի անթույլատրելի քանակով» վերտառությամբ հոդված, որում ներկայացվում են տեղական արտադրության կաթնաշոռի՝ սեպտեմբերի 6-7-ի արտադրության 7 նմուշների փորձաքննության արդյունքներ:
Փորձարկված կաթնաշոռի տեսակներն ունեն պիտանիության կարճ ժամկետ՝ մինչեւ 7 օր: Հոկտեմբերի 10-ին հրապարակելու պարագայում` նշված խմբաքանակները վաղուց սպառվել են կամ ժամկետանց են, ուստի հնարավոր չէ շուկայում հայտնաբերել եւ հաստատել կամ հերքել ժամկետանց սննդամթերքի վտանգավորությունը լաբորատոր հետազոտությամբ:
Լաբորատոր փորձարկումների արդյունքների պատճառները կարող են լինել թե արտադրության, թե իրացման եւ պահման փուլերում, հետեւաբար, հրապարկման մեջ նշված՝ «Դուստր Մարիաննա» ՍՊԸ-ի, «Թամարա եւ Անի» ՍՊԸ-ի, «Արզնու տոհմային ԹՏԽ» ԲԲԸ-ի, «Չանախ» ՍՊԸ-ի, «Աշտարակ կաթ» ընկերության, «Մարիլա» ընկերության, «Թամարա» ՍՊԸ-ի արտադրության կաթնաշոռերի անվտանգությունը պարզելու նպատակով` Ծառայությունը կիրականացնի անհրաժեշտ գործողություններ եւ հանրությանը կտեղեկացնի արդյունքների մասին»:
