ՀՀ հատուկ քննչական ծառայությունում անցած 9-ը ամիսների ընթացքում ՀՔԾ քննիչների վարույթներում քննվել են 631 (2015թ.-ին՝ 571) քրեական գործեր, որոնցից 430-ի նախաքննությունը հաշվետու ժամանակահատվածում ավարտվել է (2015թ.-ին՝ 377), իսկ մնացած 201 քրեական գործերի նախաքննությունը շարունակվում է:

ՀՔԾ-ից NEWS.am-ին հայտնում են, որ ՀՀ հատուկ քննչական ծառայությունում այսօր՝ հոկտեմբերի 14-ին, տեղի է ունեցել 2016 թվականի անցած 9-ը ամիսներին կատարված աշխատանքների արդյունքներին նվիրված խորհրդի նիստ, որը նախագահել է ծառայության պետ, արդարադատության գեներալ-լեյտենանտ Վահրամ Շահինյանը:

Խորհրդի նիստին մասնակցում էին ՀՀ հատուկ քննչական ծառայության պետի տեղակալները, վարչությունների պետերը, նրանց տեղակալները, ծառայության պետին առընթեր հատկապես կարեւոր գործերի ավագ քննիչները, ծառայության եւ աշխատակազմի այլ պաշտոնատար անձինք:

Խորհրդի նիստում ներկայացվեցին ծառայության անցած 9-ը ամիսներին կատարված աշխատանքների արդյունքների վիճակագրական տվյալները: Հիշյալ ժամանակահատվածում ՀՀ հատուկ քննչական ծառայության քննիչների վարույթներում քննվել են 631 (2015թ.-ին՝ 571) քրեական գործեր, որոնցից 430-ի նախաքննությունը հաշվետու ժամանակահատվածում ավարտվել է (2015թ.-ին՝ 377), իսկ մնացած 201 քրեական գործերի նախաքննությունը շարունակվում է:

Հատուկ քննչական ծառայության պետ Վահրամ Շահինյանը, իր խոսքում անդրադարձ կատարելով հիշյալ ժամանակահատվածում ծառայության կատարած աշխատանքներին, առանձնահատուկ ընդգծեց, որ չնայած անհամեմատ աճել է ծառայության քննիչների ծանրաբեռնվածությունը, սակայն սրա հետ մեկտեղ որոշակիորեն բարելավվել է քննության որակը, բարձրացել քննության արդյունավետությունը: Որպես աշխատանքի դրական ցուցանիշ, ծառայության ղեկավարը առանձնահատուկ ընդգծեց ծառայության վարույթում քննվող եւ հանրությանը հատկապես հետաքրքրող քրեական գործերով տեղեկատվության պարբերականության աճը, հնարավորինս թափանցիկ նախաքննության իրականացման հանգամանքը:

Խորհրդի նիստի ընթացքում Վահրամ Շահինյանը խոսեց նաեւ ծառայության առանձին աշխատակիցների կողմից թույլ տրված թերությունների ու բացթողումների մասին եւ դրանք շտկելու ուղղությամբ մատնանշեց կոնկրետ ուղիներ, տվեց հանձնարարականներ:

Հաշվետու ժամանակահատվածում կատարված աշխատանքների վերաբերյալ զեկույցներով հանդես եկան նաեւ ծառայության խորհրդի անդամները եւ նիստին մասնակցող այլ պաշտոնատար անձինք: