նախընտրելի դարձնել2015թ. հունիսին բժշկուհի Անահիտ Պետրոսյանի՝ մասնագիտական պարտականությունները ոչ պատշաճ կատարելու հետեւանքով մահացած 4-ամյա Կարինեի հարազատներն օրերս Մարդու իրավունքների եվրոպական դատարան են դիմել: Այս մասին NEWS.am-ին ասաց փոքրիկի հարազատների ներկայացուցիչ, փաստաբան Անի Չատինյանը:
Նրանք պահանջում են ճանաչել փոքրիկի կյանքի իրավունքի խախտման փաստը: Նշենք, որ տուժող կողմը նաեւ քաղաքացիական հայց ունի՝ ընդդեմ Անահիտ Պետրոսյանի: Փոքրիկի հարազատները պահանջում են 17 մլն դրամ:
Ավելի վաղ հայտնել էինք, որ 4-ամյա Կարինեն հիվանդանոց էր ընդունվել 2015թ. հունիսի 16-ին՝ ջերմություն, թուլություն, փսխում, լուծ ախտանշաններով: Վիճակը գնահատվել էր միջին ծանրության` սուր աղիքային ինֆեկցիա նախնական ախտորոշումով։ Երեկոյան փոքրիկի վիճակը կտրուկ վատացել էր։ Նրան տեղափոխել էին Վերակենդանացման բաժանմունք, սակայն կյանքը փրկել չէր հաջողվել:
Նույն օրը հիվանդանոց էր ընդունվել նաեւ փոքրիկ Էրիկը: Նրան «Արմավիր» բժշկական կենտրոնից աղիքային ինֆեկցիայով ծայրահեղ ծանր վիճակում Երեւան էր տեղափոխվել եւ 18 օրվա կոմայից հետո մահացել: Երեխայի մոր խոսքով, Անահիտ Պետրոսյանը երեխային հոգնա է արել, ներարկում, ապա կաթիլային միացրել, որից հետո 5-ամյա Էրիկը միանգամից կոմայի մեջ է ընկել:
Երկու դեպքով էլ Արմավիրի մարզի ընդհանուր իրավասության դատարանն «Արմավիր» ԲԿ-ի ինֆեկցիոն բաժանմունքի վարիչ Անահիտ Պետրոսյանին մեղավոր է ճանաչել Քրեական օրենսգրքի 130-րդ հոդվածի 2-րդ մասով (բժշկական օգնություն եւ սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը, որն անզգուշությամբ առաջացրել է բուժվող հիվանդի մահ), եւ յուրաքանչյուր երեխայի մասով դատապարտել 2 տարվա ազատազրկման, ապա մասնակիորեն գումարելով դրանք՝ վերջնական պատիժ է նշանակել 3 տարի ժամկետով ազատազրկումը:
Բացի այդ՝ դատարանը Անահիտ Պետրոսյանին 1 տարի 5 ամիս ժամկետով զրկել է մասնագիտական գործունեություն իրականացնելու իրավունքից:
Անահիտ Պետրոսյանը պատիժը կրում է բաց ռեժիմով:
