Հայաստանում տնտեսական, քաղաքական եւ սոցիալական գործոնների ազդեցությունն ընթացիկ գնաճի վրա 0.9 տոկոս է կազմել: Այս մասին հունվարի 19-ին հայտնեց «Այլընտրանք» հետազոտական կենտրոնի ղեկավար, տնտեսագիտության դոկտոր, պրոֆեսոր Թաթուլ Մանասերյանը:

Տնտեսագետի հաշվարկներով՝ ԵԱՏՄ-ի շրջանակներում ակցիզային հարկերի եւ որոշ դեպքերում ԱԱՀ-ի ավելացումը հանգեցրել է նվազագույն սպառողական զամբյուղի արժեքի 0.2 տոկոսանոց աճին:

«Ինչպես ցույց են տալիս թվերը, Հայաստանի համար արտաքին գնաճային գործոնները այդքան սարսափելի չեն, որքան երկրի ներքին խնդիրները, մասնավորապես՝ որոշ տնտեսվարող սուբյեկտների՝ գերշահույթ ստանալու ախորժակը»,- նշել է տնտեսագետը՝ հավելելով, որ գնաճային փոփոխությունները ցույց են տալիս, որ գների կտրուկ տատանումները խոսում են գնաճային միտումների ոչ ադեկվատության մասին:

Նա նշեց, որ այս համատեքստում պետությունը պետք է կիրառի իր կանոնակարգային եւ վերահսկողական գործառույթը, եւ փորձը ցույց է տալիս, որ Հայաստանի իշխանությունները կարող են մի քանի ժամում լուծել գնաճի զսպման խնդիրը: «Ինչպես գիտեք, նախագահի մոտ խորհրդակցությունից հետո որոշ ապրանքների գները մի քանի ժամում իջան»,- հիշեցրեց Մանասերյանը: