Եվրոպական հանձնաժողովը չի աջակցի «Հյուսիսային հոսք-2» նախագծին, քանի որ այն չի նպաստում Եվրոպա գազի մատակարարումների դիվերսիֆիկացմանը: Կիեւում կայացած ճեպազրույցի ժամանակ նման հայտարարությամբ հանդես է եկել ԵՀ Էներգետիկայի հարցերով տնօրինության ղեկավար Դոմինիկ Ռիստորին, հաղորդում է «ՌԻԱ Նովոստի»-ն:

«Եթե այն կառուցվի, ապա աջակցություն չի ստանա ԵՄ-ի եւ ԵԽ-ի կողմից», - ասել է պաշտոնյան: Այնուամենայնիվ, նա պարզաբանել է, որ պատժամիջոցների մասին խոսք անգամ լինել չի կարող:

Ռիստորիի խոսքով՝ Եվրահանձնաժողովը պատրաստվում է «օգտագործել բոլոր ուղիները» եւ աջակցել Ուկրաինայի ջանքերին՝ 2019 թվականից (ընթացիկ տարանցման պայմանագրի ավարտի վերջնաժամկետը) հետո երկրի տարածքով գազի տարանցման շարունակության վերաբերյալ բանակցությունների անցկացման ուղղությամբ : Պաշտոնյանի խոսքով՝ Ուկրաինայի տարածքով մատակարարումների իրականացումը մի կողմից կարեւոր է Կիեւի համար, մյուս կողմից անհրաժեշտ է Եվրոպային գազային ուղիների դիվերսիֆիկացման համար, հայտնում է «ՏԱՍՍ»-ը: