Կառավարության որոշմամբ, այսօր՝ փետրվարի 2-ին ժամանակավոր պաշտոնակատարի պաշտոնից ազատվելու է առողջապահության նախարարության աշխատակազմի ղեկավար Վահան Պողոսյանը:  Վերջինս այս պաշտոնին էր նշանակվել նոյեմբերից, Գագիկ Սայադյանի հրաժարականից հետո: Մինչ այդ Վահան Պողոսյանը բուժ վարչության  պետն էր:  

ԱՆ աշխատակազմի ղեկավար նշանակելու համար երկու անգամ Քաղաքացիական ծառայության խորհուրդը մրցույթ է կազմակերպել, սակայն Վահան Պողոսյանը ոչ մեկին չի մասնակցել՝ առողջական վիճակի պատճառաբանությամբ:  

NEWS.am-ի  տեղեկությունների համաձայն, նա հրաժարվել  է մասնակցել՝ համոզված լինելով, որ ուրիշ թեկնածուի են անցկացնելու: Ինչպես փոխանցում են մեր աղբյուրները, առաջիկայում ժամանակավոր պաշտոնակատար են պատրաստվում նշանակել Առողջապահության նախարար Հարություն Քուշկյանի իրավախորհրդատու Սուրեն Քրմոյանին, որին էլ կթողնեն այդ պաշտոնում:  Իսկ Վահան Պողոսյանը հայտնվելու  է նախարարության աշխատակազմից դուրս, քանի որ նրա նախորդ պաշտոնն արդեն Ժամանակավոր պաշտոնակատար ունի:  Նշենք, որ Պողոսյանը ՀՀԿ-ական է, իսկ նոր ղեկավարն՝ անկուսակցական: