Նոր Զելանդիայի Քրայսթչըր քաղաքում տեղի ունեցած երկրաշարժը երկրի ամենամեծ՝ Թասմանյան սառցադաշտից 30 մլն տոննա քաշով սառցակտորի փլուզման  պատճառ է դարձել, հայտնում է «Ասոշիեյթեդ Պրես» գործակալությունը։

Հարավային Ալպերի Թասմանյան սառցադաշտի վերջը գտնվում է Քրայսթչըր քաղաքից 250 կմ հեռավորության  վրա։

Սեյսմոլոգների տվյալներով, երկրաշարժի էպիկենտրոնը քաղաքին շատ մոտ է գտնվել։ Ստորգետնյա ցնցումների օջախը եղել է 4 կմ խորության տակ։

Վերջին տվյալներով, 6,3 մագնիտուդ հզորությամբ երկրաշարժը 65 մարդու մահվան պատճառ է դարձել, շուրջ 200 մարդ կարող է փլատակների տակ մնացած լինել։

Կուկա լեռը (3 764 մ) Նոր Զելանդիայի ամենաբարձր կետն է։ Դրանից իջնող Թասմանյան սառցադաշտը նոր Զելանդիայի մեծագույն  սառցադաշտն է։