Ուրան է վաճառվել  Ճապոնիայի առցանց աճուրդում՝  նման հետեւություն է արել Տոկիոյի ոստիկանական վարչությունը՝  մեկ տարվա հետաքննության արդյունքում, հաղորդում է ՌԻԱ Նովոստին:

Անցյալ տարվա հունվարին ատոմային էներգիայի վերահսկման մասնագետը նկատել էր, որ ուրան է վաճառվում առցանց աճուրդներից մեկում, հաղորդել է NHK հեռուստաալիքը: Խոսքն այսպես կոչված «աղքատացված ուրանի» մասին է` հարստացված ուրանի կողմնակի արտադրանքի՝ համեմատաբար ցածր ռադիոակտիվությամբ, ոստիկանությանը հայտնել է մասնագետը:

Հետաքննության արդյունքում ոստիկանությանը հաջողվել է դուրս գալ վաճառողի եւ գնորդի հետքի վրա: Վաճառողն արդեն հայտարարել է, որ ինքն է ձեռք բերել ուրանը «օտարերկրյա կայքերից մեկում»: Ոստիկանությունը շարունակում է հետաքննությունը:

Ճապոնիայում օրենքով արգելվում է առանց համապատասխան թույլտվության ռադիոակտիվ նյութերի վաճառքը: