Թուրքիայում «Էրգենեկոն»-ի շրջանակներում ձեբակալված լրագրողներ Նեդիմ Շեներն ու Ահմեդ Շըքըն ներկայացվել են դատարան։

Թուրքական Milliyet-ի փոխանցմամբ՝ լրագրողներին դատարանում հարցաքննելու է Ստամբուլի Բեշիքթաշի դատարանի դատախազ Զեքերա Օզը։ Բազմաթիվ լրագրողներ են հավաքվել դատարանի դիմաց՝ աջակցելու իրենց ձերբակալված գործընկերներին։

Նշենք, որ Թուրքիայում «Էրգենեկոն»-ի գործի շրջանակներում մարտի 3-ի առավոտյան մի շարք անձանց տներում խուզարկություններն ավարտվել են ձերբակալություններով, որոնց մեջ է հայտնվել նաեւ Դինքի սպանության մասին գիրք գրած, Milliyet-ի թղթակից Նեդիմ Շեները։

Նեդիմ Շեների բնակարանի խուզարկությունը ավարտելուց հետո նրան ձերբակալել եւ տեղափոխել են ոստիկանություն։  Ոստիկանական մեքենան նստելիս լրատվամիջոցների ներկայացուցիչները հարցրել են,  թե ձերբակալվե՞լ է։ «Այո, Հրանտի համար, արդարության համար»,-ասել է Նեդիմ Շեները եւ նստել մեքենան։  Այդ ընթացքում փողոցում հավաքված հարեւաններն ու անցորդները ծափերով են ողջունել Շեների խոսքը։

Նեդիմ Շեների հրատարակած «Դինքի սպանությունը եւ հետախուզության ստերը» գիրքը մեծ արձագանք է գտել Թուրքիայում, որի պատճառով լրագրողի դեմ ոստիկանությունը դատական հայց էր ներկայացրել, սակայն դատարանը ի վերջո արդարացրել է նրան։