Ղազախստանի Մաժիլիսը  (խորհրդարանի ստորին պալատ) չորեքշաբթի վավերացրել է Կասպից ծովում միջադեպերի կանխման համաձայնագիրը, հաղորդում է ՏԱՍՍ-ը՝ վկայակոչելով  խորհրդարանի մամուլի կենտրոնին:

Համաձայնագիրը ստորագրվել է Ակտաու քաղաքում 2018-ի օգոստոսի 12-ին:

Այն վերաբերում է Կասպից ծովում,  տարածքային ջրերից դուրս եւ դրանց օդային տարածքում գործող  կողմերի ռազմանավերին եւ ինքնաթիռներին:

«Կողմերի ռազմանավերի եւ օդանավերի գործողությունները պետք է իրականացվեն համաձայնագրի դրույթների համաձայն `չվնասելով կողմերի պետությունների ինքնիշխան եւ բացառիկ իրավունքները եւ չպետք է հանգեցնեն անարդարացի խոչընդոտների կողմերի ինքնիշխան եւ բացառիկ իրավունքների իրականացման ժամանակ», - ասվում է Մաժիլիսի միջազգային գործերի, անվտանգության եւ պաշտպանության կոմիտեի եզրակացությունում:

Համաձայնագրի 3-րդ հոդվածի համաձայն կողմերը պետք է միջոցներ ձեռնարկեն, որպեսզի ռազմանավերի հրամանատարները անշեղորեն կատարեն 1972 թվականի Ծովում նավերի բախման զգուշացման միջազգային կանոնները:

Բացի այդ Մաժիլիսը  վավերացրել է Ռուսաստանի հետ ռազմական նշանակության արտադրանքի առկայության եւ նպատակային օգտագործման վերահսկողության իրականացման կարգի մասին համաձայնագիրը: Ռազմական նշանակության արտադրանքը մատակարարվում է 2013-ի դեկտեմբերին Ղազախստանի եւ Ռուսաստանի Դաշնության միջեւ կնքված ռազմատեխնիկական համագործակցության համաձայնագրի շրջանակում:

Համաձայնագիրը ստորագրվել է 2017 թվականի նոյեմբերի 29-ին Մոսկվայում: Փաստաթղթի համաձայն, պայմանագրի շրջանակներում ռազմական արտադրանք մատակարարող կողմը  իրավունք ունի վերահսկելու դրա առկայությունը եւ նպատակային օգտագործումը: Իսկ այն կողմը, որին մատակարարվում է ռազմական արտադրանք, անհրաժեշտ պայմաններ է ստեղծում մատակարարի համար` վերահսկողություն իրականացնելու նպատակով: