նախընտրելի դարձնել
Պակիստանում դատարանը սոցցանցերի աստղի եղբորը քրոջ սպանության մեջ մեղավոր է ճանաչել, հաղորդում է Reuters-ը:
2016-ին պակիստանցի մոդել Քանդիլ Բալոչի «պատվի սպանությունը» հանգեցրել է օրենքների խստացմանն ու վիճաբանությունների առիթ դարձել երկրում տարածված «պատվի սպանությունների» շուրջ:
Դատարանն աղջկա եղբորը՝ Մուհամմեդ Վասիմին մեղավոր է ճանաչել եւ ցմահ ազատազրկման դատապարտել:
Փաստաբանի խոսքով՝ 6 այլ դատապարտյալներ, նրանց թվում՝ Բալոչի 2 մյուս եղբայրները, արդարացվել են:
Վասիմը 2016-ին խոստովանել է, որ խեղդել է իր 26-ամյա քրոջը սոցցանցերում նրա գործունեության պատճառով:
Քանդիլ Բալոչը Պակիստանի համար հանդուգն գրառումներ է կատարել Facebook-ում, որոնցում խոսել է երկրում մարդկանց մտածելակերպը փոխելու փորձերի մասին: Նրան հաճախ սպառնացել են, սակայն աղջիկը շարունակել է սադրիչ լուսանկարներ եւ տեսանյութեր հրապարակել:
Քանդիլ Բալոչին, ում իրական անունը Ֆաուզիա Ազիմ է, անվանել են պակիստանցի Քիմ Քարդաշյան: Նա մոդելային կարիերա է սկսել սոցցանցերում իր փառքի շնորհիվ:
Աղջկա սպանությունը ցնցել է Պակիստանը, կառավարությունը որոշել է խստացնել օրենքերը, որպեսզի մարդասպանները չկարողանան ազատ արձակվել, եթե զոհի ընտանիքը ների նրանց:
Պակիստանում ամեն տարի պատվի պատճառով սպանվում է մոտ 500 կին: Հիմնականում մարդասպան են դառնում կանանց ընտանիքների անդամները, որոնց համար դրդապատճառ կարող են հանդիսանալ այլ տղամարդկանց հետ շփումը կամ պահպանողական արժեքների ցանկացած այլ խախտում:
