Ղազախստանի պետծառայողներին առաջիկայում թույլ կտան օգտվել սմարթֆոններից։ Այս մասին ասել է թվային զարգացման, նորարարությունների եւ օդատիեզերական արդյունաբերության նախարար Ասկար Ժումագալիեւը, տեղեկացնում է Tengrinews-ը։

«Շենքերի սեփականատերերը, որոնցում տեղակայված են պետական մարմինները, պետք է  ոստիկանության հետ համապատասխան ուղեցույց ստորագրեն, եւ պետծառայողներն այդ պահից կկարողանան հանգիստ օգտվել սմարթֆոններից այդ շենքերում։ Կարեւոր է հասկանալ, որ տեղեկատվական անվտանգության հարցերը ոչ ոք չի հանել։ Իհարկե, տեղեկատվական անվտանգությունն ընդհանրապես եւ ամբողջովին պետծառայողների եւ պետական մարմնի ղեկավարի պատասխանատվության խնդիրն է»,- ասել է նախարարը՝ պատասխանելով լրագրողների հարցերին կառավարության նիստից հետո։ Նա նշել է, որ համապատասխան որոշումն այսօր ներկայացվել է կառավարության դիտարկմանը, եւ այն հավանության է արժանացել։

«Այսօր այն հաստատվել է։ Շենքերի սեփականատերերը եւ ոստիկանությունը առաջիկայում կստորագրեն այդ ուղեցույցը։ Դրանից հետո պետծառայողները կկարողանան օգտվել սմարթֆոններից»,- ավելացրել է Ժումագալիեւը։

Պատասխանելով լրագրողների հարցին, թե արդյոք սմարթֆոնների երկարատեւ արգելքը սխալ որոշում չի համարվում, տեղեկատվության եւ հասարակական զարգացման նախարար Դաուրեն Աբաեւն ասել է, թե ինքը համաձայն չէ դրան։ «Կարծում եմ, որ մենք պետք է դրա միջով էլ անցնենք։ Այստեղ հարցը շատ գործոնների է վերաբերում, այդ թվում եւ պետծառայողների համար, բոլորիս համար սմարթֆոններից հոգեբանական կախվածության առումով։ Այո, իսկապես մինչ այդ մեր նախարարությունում թեստավորվել էր պիլոտային հավելված սմարթֆոնների խցիկներն արգելափակելու համար։ Այդ ժամանակ պետծառայողներին սմարթֆոնները վերադարձնելու հարցը չէր դիտարկվում։ Հիմա նման հարց չկա։ Դե, գուցե, երբեւէ անվտանգության հարցերը նորից նոր մակարդակ բարձրանան, գուցե եւ անհրաժեշտ լինի»,- ասել է Աբաեւը։