Հայաստանի քննչական կոմիտեի Արագածոտնի մարզային քննչական վարչության ավագ քննիչ Ոսկանյանի կողմից նյութեր են նախապատրաստվում երեկ՝ դեկտեմբերի 2-ին, ոստիկանության Աշտարակի բաժին ստացված ահազանգի փաստով:

Shamshyan.com-ի  հաղորդմամբ, նախօրեին երեկոյան ոստիկանության Աշտարակի բաժին է դիմել Երեւանի բնակիչ, 51-ամյա Լիդա Ղ.-ն եւ հայտնել, որ նույն օրը՝ ժամը 14:15-ի սահմաններում, Աշտարակ քաղաքում բնակվող իր հոր՝ 87-ամյա Խորեն Ղ.-ի ինքնազգացողությունը վատացել է եւ ինքը ահազանգ է տվել «Աշտարակ» բժշկական կենտրոն:

Աղբյուրի տեղեկություններով, ըստ Լիդա Ղ.-ի՝ ահազանգով ժամանել են շտապօգնության բրիգադը՝ բժիշկ Պ. Կոշկերյանի գլխավորությամբ, ովքեր իր հորը ներարկել են «դեքսամետազոն» եւ «վերապամիլ» տեսակի դեղամիջոցներ, ինչի արդյունքում հայրը նույն օրը ժամը 16:00-ի սահմաններում տանը մահացել է:

Դեպքի վայր ժամանած դատական բժիշկը, զննելով դին, հայտնել է, որ դիակի արտաքին զննությամբ վնասվածքներ չեն հայտնաբերվել: Ավագ քննիչ Ոսկանյանի որոշմամբ նշանակվել է դիակի դատաբժշկական փորձաքննություն: